Ka hihiri, ka wawana, ka ngahau hoki te wiki o te reo Māori 2016! Ka kite mai te motu o Aotearoa i te reo Māori kei ngā whare hākinakina, kei ngā papa tākaro, kei ngā pūrongo, kei te ipurangi hoki. Otirā ka rongo te motu ko te reo Māori tēnei mō ngā tāngata katoa o Aotearoa.

Hei te 4 - 10 o Hōngongoi tēnei hōtaka.

Ko te kaupapa i tēnei tau ko ākina te reo – behind you all the way ko te tautoko i te tangata mā te reo Māori, hei whakahihiko, hei hikihiki i ngā tāngata katoa – mā te reo Māori.

Whai ake i ngā mahi o tērā tau, ka mahia mai anō kia 50 ngā rerenga kōrero Māori ngāwari, hei kōrero mā te hunga iti noa nei te reo.

E mau ai te mana o ngā rerenga kōrero ki tua atu i te wiki noa o te reo Māori, ka whakatairangatia anō ki ngā kaupapa hākinakina, tīmata ana i te whakataetae Ōrimipia me ētahi atu kaupapa hākinakina rongonui puta noa i te tau, ērā e hihiko ai te ngākau tangata ki te tautoko i ō tātou toa tākaro rongonui.

Hei ia tau ko Te Wiki o Te Reo Māori e ārahina ana e Te Taura Whiri i te Reo Māori, hei whakatairanga i te reo ki Aotearoa. Mā te whakatairanga i te reo taketake o Aotearoa, ka mārama te motu katoa ki tōna reo, ki te kōrero hoki i ngā rerenga ngāwari ia rā, ia wiki, ia marama hoki o te tau.

RSS Feed