Ko Whakamātauria Tō Reo Māori te Whakamātautau Matataunga Reo Māori ā-Motu, he kaupapa e whakahaeretia ana e Te Taura Whiri i te Reo Māori. E rua ngā momo whakamātautau i tēnei wā: ko te Whakamātautau ā-Rapu Taumata (LFE) me te Whakamātautau ā-Rāngai Tūmatanui Māori (PSM) Kei te tuwhera ngā whakamātautau ki ngā tāngata takitahi, ki ngā whakahaere hoki e hiahia ana kia whakamātauria ō rātou Matataunga Reo Māori, e ai ki te pou tarāwaho ‘Whakamātauria Tō Reo’.  

Whakamātautau Rapu Taumata

Mā te Whakamātautau Rapu Taumata, ka puta he tohu whānui mō te kaha o ngā kaitono ki te mōhio ki ngā kupu ka kōrerohia, me tō rātou mōhio ki te rārangi kupu me te wetewete reo.

He whakamātautau ā-tuhi anake te whakamātautau nei, ā, kotahi haora, 10 meneti te roa, tae atu ki te 10 meneti hei pānuitanga. Ka whai i te wāhanga whakamutunga, he mahi whaiaro e pātai ana mō ngā wheako reo Māori. 

Ko ngā wāhanga e toru kei roto i te whakamātautau:

  • mōhio ā-taringa ki te kupu (mahi whakarongo me te tuhituhi)
  • rārangi kupu (mahi pānui, me te kōwhiri whakautu kōwhiringa-maha)
  • wetewete reo (mahi pānui,me te kōwhiri whakautu kōwhiringa-maha)

Ka pūrongotia ngā māka o te Whakamātautau Rapu Taumata ki ngā kōeke mai i te 1 ki te 5, ko te 5 te taumata matataunga teitei rawa atu.  

LFE Handbook [PDF, 625 KB]

Whakamātautau Rāngai Tūmatanui Māori 

Kua waihangatia te Rāngai Tūmatanui Māori mō te hunga anake e whakamahi ana i te reo Māori ki roto i te wāhi mahi rāngai tūmatanui.

He whakamātautau ā-tuhi, ā-waha hoki te whakamātautau nei. Kotahi haora, 10 meneti te roa tae atu ki te 10 meneti hei pānuitanga.  Āwhiwhi ki te 20 ki te 30 meneti te roa o te whakamātautau ā-waha, ā, ka whakahaeretia ā-rōpū, me te kore e nui ake i te 3 ngā kaitono i te wā kotahi. Ka whakahaeretia e tētahi kaiwhakawā ētahi kōrero e hāngai ana ki ngā mahi a te rāngai tūmatanui me te whakatakoto āhuatanga tērā pea ka toko ake. 

Kua tau he tikanga mō te noho i te Whakamātautau Rāngai Tūmatanui Māori (PSM), ā, me eke rawa ngā kaitono ki te kōeke 3 o te Whakamātautau Rōpū Taumata (LFE) kia uru mai.   

PSM Handbook [PDF, 519 KB]

Rēhitatanga me te rā e tū ai ngā whakamātautau

E rua wiki i mua i te rā whakamātautau, katia ai te wā rēhita. Ka tū ngā whakamātautau ki Te Whanganui-a-Tara ā te Rāapa, te 11 o o Whiringa-ā-nuku. Ka kati ngā rēhitatanga ā te 29 o Mahuru 2017. 

Ki whea: Nau Mai Room, TPK

Ā hea: 10:30am-11:40am

Tērā pea ka whakapanoni te rā e tū ai ngā whakamātautau, te wāhi rānei. Ki te puta tēnei āhuatanga, ka tuku pārongo atu ki ngā kaitono kua rēhita ā, ka pānuihia hoki ki te paetukutuku a Te Taura Whiri i te Reo Māori.

He utu anō mō ngā whakamātautau?

Kāore he utu mō te noho i ngā whakamātautau a Whakamātauria Tō Reo Māori. Kei tēnā, kei tēnā te tikanga ki te whai i te whakamātautau engari, māna anō hei utu tōna haerenga mai ki ngā whakamātautau.

Pārongo, rēhitatanga me ngā patapātai 

Whakapā atu ki a Hollie Ellison - 04 4716728, ki matapuna@tetaurawhiri.govt.nz rānei mō ngā puka rēhitatanga, ngā pukapuka kaitono, me ngā patapātai e pā ana ki ngā whakamātautau. 

LFE Puka Tono [PDF, 406 KB]

PSM Puka Tono [PDF, 406 KB]

RSS Feed