Te tuku pūtea ki te hapori

(Te whakapakari i te reo o te whānau me te hapori)

Koia nei tētahi mātāpono mātua mō te whakapakari i te reo o te hapori: Ko ngā kaupapa kua waihangatia e te hapori,  ko te mana whakahaere kei te hapori, e whakatinanahia ana e te hapori, tērā tonu e tutuki pai ake ai ēnei i ērā e waihangatia ana i waho atu o te hapori. I tēnei horopaki, ko tā Te Taura Whiri i te Reo Māori he whakarato i ōna anō pūtea ki ngā kaupapa whakarauora reo e arahina ana e te hapori.

Ko Te Reo Hapori te ringa toha pūtea o Te Taura Whiri i te Reo Māori. He tuku moni tāna ki ngā kaupapa reo Māori i ngā kāinga me ngā hapori, me te arotake anō i aua kaupapa. Hui katoa, e $6.3 miriona te tahua kei Te Reo Hapori i ia tau, hei whakapau māna ki ētahi kaupapa matua e toru. Koia ēnei:

  • ko te kaupapa tahua whakataetae o Mā te Reo - e $2.5 miriona tōna tahua tūāpapa i ia tau
  • ko te Community Based Language Initiatives (CBLI) – e $2.317 miriona tōna tahua tūāpapa i ia tau.  I tēnei wā, ehara tēnei i te tahua ka whakataetaehia
  • ko He Kāinga Kōrerorero - $1.5 miriona tōna tahua tūāpapa i ia tau. I tēnei wā, ehara tēnei i te tahua ka whakataetaehia.

Mā te Reo

Mō ētahi atu kōrero mō Mā te Reo, tae atu ki te tono pūtea i tēnei tahua (he
tahua e tuwhera ana ki ngā kaitono katoa) me pāwhiri a konei.

Ki te hunga kua whiwhi kirimana kē i a mātou

Mehemea kua whai kirimana koe i a mātou, tēnā pāwhiria a konei (external link)  ki te tuku i ā koutou pūrongo, ki te tiki rānei i ngā kōrero mō aua kirimana i te pātengi raraunga tawhito.

CBLI

Ka whakairia ētahi atu kōrero mō tēnei kaupapa ā kō ake nei.

He Kāinga Kōrerorero

He kaupapa a He Kāinga Kōrerorero hei poipoi i te reo i te kāinga. E kirmanahia ana a Te Ataarangi e Te Taura Whiri i te Reo Māori ki te whakahaere i tēnei kaupapa. Anei ōna whāinga matua:

  • kia kaha ake te matatau ki te reo Māori, kia kaha ake te rere o te reo Māori
  • kia kaha ake te mōhio ki ngā rautaki whakapakari ake i te reo Māori
  • kia whiria he taura ki ērā atu kaituku kaupapa reo Māori me te whakakaha i ngā whānau i roto i ngā mahi o te ao Māori

I ōna wā anō o te tau ka whakahaeretia e ngā kaituku o He Kāinga Kōrerorero ētahi hui whakangungu. He hui ēnei e kōrero ai ngā kaipoipoi i ngā mea e mātua hiahiatia ana e pakari ake ai te reo o ngā whānau, e horahia anō ai hoki ētahi rauemi. Ka mahi anō ngā kaipoipoi ki te tō mai i ō rātou hapori ki roto i He Kāinga Kōrerorero, ki te kimi huarahi hoki e tautokona ai ngā whānau.

Mō ētahi atu kōrero e pā ana ki te whai wāhi mai a tō whānau ki te kaupapa nei, whakapā atu ki Te Ataarangi Trust (external link) .

RSS Feed