He karere mā ngā kaitono o Mā te Reo

Ka kati ngā tono mō Mā te Reo ā te Rātapu, te 31 o Hōngongoi 2016, ā te 11:59 o te pō.

Nā, kua 4 wiki te Rauna e tuwhera ana, nō reira e whakahau ana mātou i te hunga e kimi pūtea ana mō ā rātou kaupapa reo Māori, kua tūturu oti ngā tono ā te rā kati.

He aha tēnei mea, te tahua o Mā te Reo?

Ko tā ngā pūtea o Mā te Reo, he whai ki te hāpai i ngā kaupapa e whakatinana haere ana i ngā hua mātāmua e rima e tohua ana e te Rautaki Reo Māori a te Kāwanatanga (2014).

Ko ngā wehenga tuku pūtea mō te tauwhāinga o te tau 2016, ko:

  • te whakamahere reo
  • ngā rauemi reo
  • ngā akoranga reo
  • ngā hui i te hapori.

Me pēhea te tono i ngā pūtea whakataetae o Mā te Reo?

Ko te mahi tuatahi mā te kaitono i te pūtea whakataetae o Mā te Reo, he tono kia rēhitatia ia hei kaituku kaupapa, mā roto i te pūnaha hou, Pūnaha Pūtea. Kia whakaaetia koe hei kaituku kua mana te rēhitatanga, ka āhei koe te uru ki tō mata-pārongo, ka āhei anō te tono pūtea rā roto i te Pūnaha Pūtea ina huaki te tauwhāinga toha pūtea.

Ka huaki te tauwhāinga pūtea mō te tau 2016 ā te Rāmere te 1 o Hōngongoi, 2016, ka kati ā te 11:59 o ngā hāora i te pō o te Rātapu te 31 o Hōngongoi, 2016. Ko ngā tono kāore e tae mai i mua i te rā kati, e kore e tirohia.

Ka whakamōhiotia atu ngā kaitono katoa i pēheatia tā rātou tono i mua i te paunga o te 25 o Whiringa-ā-rangi 2016.

Hei tono i te pūtea nei, pāwhiria a konei (external link)

Akoranga ataata

Hei āwhina ake i ngā kaitono kia waia ai rātou ki te pūnaha tono hou nei, kua hangaia tētahi akoranga ataata. Me pāwhiri a konei ki te mātaki i te ataata.   

https://drive.google.com/drive/folders/0B3fsFbYhrYmvfk5QelBVaVEtQXJoSUdmOGNySHdLb3VFeUJ4aDFnLU5HcUlYZVpSZDdJNFU (external link)

He whakamārama mō ngā wehenga tuku pūtea

Te whakamahere reo

Ka aro tēnei kāwai ki te whakawhanake, te arotake/whakahou rānei i tētahi mahere/rautaki reo Māori mō te whānau, iwi, marae, tētahi whakahaere ā-hapori rānei.

Kei te whai ēnei kaupapa ki te whakaū e whai wāhi ana ngā mahi reo e mahia ana e tētahi rōpū ki tētahi mahere/rautaki reo whakamaru. Ka taea ēnei i te tukanga e marohitia ana:

  • he rangahau tatauranga iwi;
  • he tirohanga whānui/rangahau/kōtaha hapori o te rōpū, ngā rōpū rānei mō rātou te kaupapa kia mōhio ai ki ō rātou kaha matatautanga me ō rātou matawara ki te reo;
  • he tūhurahura me te whakahāngai (ki te tika) i ētahi mahere/rautaki o tēnei wā ka whai pānga ki tō rōpū;
  • he rārangitanga o ngā hui whitiwhiti kōrero ki ngā mema o te rōpū, me ngā tāngata anō hoki he mātanga tō rātou ki te whakamahere reo;
  • tētahi rōpū iti, tētahi rōpū tohutohu reo rānei hei ārahi me te whakahaere i te tukanga whakamahere;
  • ētahi whāinga poto (1-3 tau), āhua roa (3-10 tau), wā roa (10+tau) me ngā ūnga ka taea te ine;
  • te tautuhi i ngā rauemi e hiahiatia ana ki te whakatinana i te mahere/rautaki reo;
  • he mahere whakatinana e rārangi nei ngā mahi kia mahia mō te whakatutuki i aua ūnga, whāinga hoki;
  • he hātepe mō te whakamanatanga o tētahi mahere/rautaki e te rōpū; ā,
  • he tukanga mō te aroturuki me te aromātai i te haere whakamua.

Ngā rauemi reo Māori

Me mātua tautoko ēnei kaupapa i te hanganga o ngā rauemi e mau ai, e ākona ai te reo, ā, ko te mau o te reo Māori i te tamariki me te rangatahi te tino whāinga. 

Kua rerekē te arotahinga o te karangatanga rauemi reo nei. Ka tautokona tonutia ngā kaupapa rauemi ICT, engari e kore e tukuna e Mā te Reo te katoa o te moni e hiahiatia hei whakaoti i aua tū kaupapa. Mā Mā te Reo e pīkau ngā utu ki ngā kaiwhakamāori me te whakaū i te pai o te reo, engari koirā anake.

Ko ētahi momo mea ka tautokona, ko te hanganga me te tohanga (utu kore, mō te utu iti rānei) o ngā rauemi reo pērā i te pukapuka, i te kēmu, i te panga, i te rauemi arapāho-rau, i te taupānga, i te rauemi noho ipurangi, i te kōpae oro, i te kōpae ataata.  Me rauemi kua hangaia hei whakamahi i te kāinga, i te marae, i te hapori rānei. Ka mutu, me tino tiketike te pai o te reo Māori o te rauemi.

E whiwhi pūtea ai te kaupapa:

  • me whakaatu rawa e mātua hiahiatia ana te rauemi e whakaarotia ana
  • tērā pea e anga ana ki tētahi wehenga taipakeke whāiti
  • tērā pea e hāpai ana i ngā kōrero, i ngā paki ā-iwi, i te reo ā-iwi o tōu nā rohe
  • kia mātua kitea ka uru mai, ka whai wāhi mai te hapori ki te kaupapa
  • kia kaua e hangaia te rauemi i runga i te whakaaro he kaupapa mahi moni
  • me whakamātautau tētahi tauira tuatahi o te rauemi ki te hunga mā rātou te rauemi.

Ko ngā kura e āhei ana te tono pūtea i Te Tāhuhu o te Mātauranga mō ngā rauemi reo Māori, kāore e āhei mai ki tēnei tahua.

Ngā akoranga reo Māori

E whakaaetia ana ngā hōtaka reo, ngā akoranga/karaehe reo, ngā hui reo i ngā rangi whakatā, ngā hui reo kotahi wiki te roa, tae atu ki ngā wānanga reo me ngā kura reo ā-iwi kua roa e tū ana. Tērā pea ka whakahaeretia e te whānau, e te hapū, e te iwi, e te hapori, e te marae rānei.

Mō ēnei kaupapa:

  • me rumaki reo Māori, me reorua rānei ngā whakahaere
  • kei a koe te whiriwhiri mō te matatau o te hunga mā rātou ake ngā akoranga/hui
  • e pai ana te akoranga/hui kotahi noa, e pai ana anō hoki kia maha ngā akoranga/hui
  • e pai ana ngā akoranga kotahi rā te roa, e pai ana anō hoki ngā wānanga e hia rangi kē te roa
  • e pai ana kia whakaakona katoatia i te nohoanga kotahi, kia haere putuputu rānei ngā akoranga, ngā karaehe
  • tērā pea e arotahi ana ki tētahi kaupapa reo, ki tētahi tikanga rānei (hei tauira, te karanga, te whaikōrero, te mau taiaha, te raranga, te waiata, ngā tikanga tūturu, te kawa, te hauora, te karakia, te mahi tukutuku, te whakairo, te aha atu)
  • tērā pea ko te whakakaotanga o ngā kōrero ā-waha mō te iwi, mō te hapū, mō te whānau
  • tērā pea ka whakaaetia ngā haere ki ētahi wāhi e tino whai tikanga ana, e hāngai ana ki te kaupapa
  • tērā pea he karaehe ka āta tohua te rā e tīmata ai, te rā e mutu ai, me ngā mea katoa ka whakaakona o roto i taua wā.

Ngā hui nui o te hapori

Ko ngā mea ka mātua tautokona i tēnei karangatanga, ko ngā hui e aro nui ana ki te tamariki, ki te rangatahi. E anga ana te titiro ki ngā huinga tāngata e kore pea e tino rongo, e tino whai wāhi ki te reo Māori ki te kore ēnei tūmomo hui.

Tērā pea he konohete reo Māori, he taiopenga, he pō tākaro kēmu, he whakataetae tū ki te kōrero, he mahi karapu reo Māori, ka mutu me kaupapa rumaki reo Māori, me reorua rānei. Ko te arotahinga, kia nui ake ngā horopaki me ngā wāhi e kōrerotia ai te reo Māori.

Mō ēnei kaupapa:

  • me rumaki reo Māori, me reorua rānei ngā whakahaere
  • kia kaua e whakatūria i runga i te whakaaro he kaupapa mahi moni.

 


 [SH1]External link

 [SH2]Link

 

RSS Feed