Kia ora te reo Māori

Kia ora te reo Māori. Kua whakataungia tēnei ariā hei whakanui i Te Wiki o te Reo Māori e whai wāhi ai i te 11-17 o Mahuru o te tau nei.

Kua tīkina taua kōrero hei whakarangatira anō i tēnei mihi taketake nō Aotearoa, hei whakaahua hoki i te takune o te whakaaetanga ki waenganui i te Karauna me te Māori e pā ana ki te whakarauora i te reo Māori i raro i te Ture mō te Reo Māori 2016.

Nā tēnei Ture i whakatū whakahaere hou, ko Te Mātāwai, hei ārahi i ngā kaupapa whakarauora ki ngā iwi Māori. Ka hāngai kē atu ngā mahi a Te Taura Whiri i te Reo Māori ki te rāngai tūmatanui me Aotearoa huri noa. Mā tātou katoa e whakaū kia ‘ora’ ai te reo Māori – hei reo hauora anō. Ko te tino take tērā o te mihi ‘kia ora’.

Hei ia tau ko Te Wiki o Te Reo Māori e ārahina ana e Te Taura Whiri i te Reo Māori, hei whakatairanga i te reo ki Aotearoa. Mā te whakatairanga i te reo taketake o Aotearoa, ka mārama te motu katoa ki tōna reo, ki te kōrero hoki i ngā rerenga ngāwari i ia rā, i ia wiki, i ia marama hoki o te tau.

RSS Feed