Te Wiki o te Reo Māori 2018 – Kia Kaha te Reo Māori!

He mea pānui i Ngā Tohu Reo Māori 2017 hei te 10-16 o Mahuru 2018 tū ai Te Wiki o te Reo Māori o tēnei tau. Ko te 14 o Mahuru te Rā o te Reo Māori, he whakamaumaharatanga ki te rā i te tau 1972 i whakatakotohia te petihana mō te reo Māori ki te whare pāremata. Otirā koirā hoki te marama e whakanuia anō ai te reo Māori e te tini māioio ki te kaupapa Mahuru Māori mā te kōrero reo Māori anake mō te roanga atu o te marama.

Kua oti te whiriwhiri i te pepeha mā Te Wiki o te Reo Māori 2018 ‘Kia Kaha te Reo Māori’, he mea whai ana i te angitū o te pepehā ‘Kia Ora te Reo Māori’ o te tau kua hipa.  E mōhio pai ana a Aotearoa whānui ki te kōrero ‘Kia Kaha’, me tōna tikanga, he mea whakahau i te tangata kia māia, kia tū pakari. He wā anō ka kōrero tātou mō te reo anō nei he tangata, ka kōrerohia te hauora, te kaha me te whakarauoratanga o te reo. Nō konā e whakatenatena ana te pepeha nei i a tātou katoa kia whakapakari ake i te reo Māori.

“Ka ahu mai te pakaritanga o tētahi reo mōrearea i te nui o tōna mana; i te noho mārama o te iwi whānui me pēhea te tautoko i te mahi whakarauora reo; i te ako me te kōrero a te mātinitini i te reo; me te noho mai o ngā kupu katoa e tika ana e taea ai ngā kaupapa kōrero katoa te kawe ki taua reo. ”

He ngoi kei ngā tāngata katoa o Aotearoa ki te whakakaha ake i tō tātou reo. Kua tatū ngā rā, kua tatū anō te kaupapa whāiti mō tēnei tau, ā, ko te tūmanako kia ngaringari ake ngā whakahaere, ngā kamupene me ngā rōpū i te hapori ka āta manaaki mai i Te Wiki o te Reo Māori 2018. Kia kaha rā tātou!

RSS Feed