Breadcrumbs

Whakanuia te toru ngahurutanga o Te Taura Whiri i te Reo Māori

ttw-board-members-87

Te Poari o Te Taura Whiri i te Reo Māori (1987) Tākuta Ray Harlow, Ahorangi Tīmoti Kāretu, Tā Kingi Matutaera Īhaka, Hon Koro Wetere, Kāterina Te Heikōkō, Mataira, Ānita Moke. Māori Language Commission with Koro Wetere. Dominion post (Newspaper): Photographic negatives and prints of the Evening Post and Dominion newspapers. Ref: EP/1987/4271/18-F. Alexander Turnbull Library, Wellington, New Zealand. /records/23180948

Ā te 1 o Hereturikōkā ka eke ki te 30 tau mai i te whakatūnga o Te Taura Whiri i te Reo Māori i runga i Te Ture Reo Māori 1987.

Ko te kaupapa o Te Taura Whiri i te Reo Māori he whakamana i te reo Māori hei reo mana ā-ture, he whakatairanga he rangahau hoki i te reo Māori, he ārahi hoki i te whakatinanatanga o te rautaki reo Māori hou a te Kāwanatanga.

Nā te hurihanga o te ture i tērā tau kua huri hoki te aro o Te Taura Whiri i te Reo Māori ki ngā mahi a te Karauna hei tautoko i te whakarauoratanga o te reo Māori. He rōpū hou kē ināianei ko Te Mātāwai e aronui ai ki te iwi, te hapū, me te whakarauoratanga ā-hapori.

“E toru tekau tau ki muri kāore anō he reo irirangi Māori he whakaata Māori rānei, ko te Kōhanga Reo tonu he pito mata; kāore anō he akoranga ā-reo Māori, kāore anō he wānanga, ka mutu he iti noa iho kē te ako reo Māori i roto i ngā kura,” e ai ki a Ngāhiwi Apanui te Tumuaki o Te Taura Whiri i te Reo Māori.

“He pūrongo hou i tēnei marama e whakaatu ana kei te tuku iho anō te reo Māori ki ngā whakatupuranga mō te wā tuatahi rawa mai i te ngahuru tau 1970.

“Katoa tēnei i hua mai i ngā mahi a ngā Minita, a ngā tari kāwanatanga, tae rawa ki te iwi Māori, ki ngā whānau, ngā hapū, ngā iwi anō hoki.

“Ko te mahi a Te Taura Whiri i te Reo Māori i roto i te 30 tau kua huri, he ū tonu ki te tautoko i te reo Māori hei reo ora anō mō Aotearoa katoa. Kāore e wareware ngā koha mai a te hunga kaiārahi kua riro ki te pō tae noa ki te hunga e poipoi tonu nei i te reo.”

“Tērā anō hoki ngā whakaaetanga maha a ngā Minita me ngā tari kāwanatanga ki ngā whakataunga a te Te Rōpū Whakamana i te Tiriti o Waitangi otirā ngā hiahia o te iwi Māori. Hei tuatahitanga hoki te ture hou nei mō te ao katoa, e whakaae ake ana te Karauna i hē, i hara hoki i mua, me tana whakaae iho anō ki te mahi tahi kē ki te iwi Māori ā muri iho nei ki te tautoko kē i te reo Māori.

ttw-board-members-17

Te Poari o Te Taura Whiri i te Reo Māori (2017) Charisma Rangipunga (Toihau Tuarua), Wayne Panapa, Tākuta Wayne Ngata (Toihau), Charlie Tepana, Hinerangi Edwards.

“Ka nui tonu ngā rā o te reo Māori. Ko tā mātou mahi mō te Karauna he mahi tahi ki te Māori kia eke ai te reo Māori ki ngā taumata tika e taea ai e ngā tāngata katoa o Aotearoa, mō ake tonu. Hei tīmatanga noa iho ēnei tau tuatahi e toru tekau nei.”

Mō ētahi anō kōrero whakapā mai ki:

Arihia McClutchie arihia@tetaurawhiri.govt.nz

04 471 6730

← Back to the news

RSS Feed