Breadcrumbs

E mihi ana Te Taura Whiri ki te whākitanga mō te reo Māori

E mihi ana a Ngahiwi Apanui te Tumuaki o Te Taura Whiri i te Reo Māori, ki te whākitanga a te Karauna i te rā nei - nā ngā mahi a te Karauna tonu i heke anō ai te reo Māori.

“Ahakoa te whāki a te Minita i ngā mahi a te Karauna i heke ai te reo Māori, ko tā mātou mahi kē he rapu i te oranga,” e ai ki a Ngahiwi.

“E whakapono ana mātou he wāhanga nui tō ngā kaiako me ngā kura ki te whakarauora i te reo Māori.

“Mā rātou e āwhina ki te whakaora anō i te reo Māori ki tōna taumata tika, ka aukati hoki i te heketanga, mā te whakaako i te reo Māori hei kaupapa matua ki ngā kura, rite tonu ki te reo Ingarihi.

“I tēnei wā ko te mahi nui ki te whakarauora i te reo Māori kei runga i ngā pokohiwi o te tokoiti, o ngā taikākā reo Māori ā-iwi, ā-hapori hoki – ka mutu e tino tutuki ai me tautoko rawa rātou.

“Tērā ka whakahaere tonu i ngā akomanga reo Māori ā-hapori, i ngā wānanga rānei, ka whakatairanga rānei i te reo ki ngā kaupapa maha, ka hanga haere tonu rānei i ngā hōtaka pouaka whakaata reo, i ngā whakamahinga rorohiko me ngā ipurangi rānei, engari e kore e rahi ake ngā kaikōrero Māori i ēnā mea anake.”

“Me akiaki kia āhei te reo Māori ki ngā wāhi katoa, koia anō hoki ki ngā kura, otirā me rautaki ngātahi rawa e whai hua anō ai mō te reo Māori me te motu katoa.”

← Back to the news

RSS Feed