Breadcrumbs

E whakamānawa ana Te Taura Whiri ki te rautaki reo a

E whakamānawa ana Te Taura Whiri i te Reo Māori ki Te Arataura o Waikato-Tainui mō tana rautaki whakarauora i te reo Māori mō ōna uri.

“Kātahi te koa, te whakahauora, te manawa-reka ki ngā rōpū e kōkiri ana kia rahi ake ngā kaikōrero Māori matatau i ō rātou rohe.”

“Ka nui te mihi ki Waikato-Tainui e whai ana kia 80% ō rātou uri e matatau ana ki te reo hei te tau 2050,” te kī a te Tumuaki o Te Taura Whiri a Ngahiwi Apanui.

“He whāinga nui tā rātou, inā hoki tō rātou rahi i tēnei wā he 60,000 tāngata. E tika ana kia nui, kia māia te whakaaro e mutu ai te heke o te tokomaha e kōrero Māori ana, ā, e whakapono ana hoki ahau ka tutuki i a rātou.

“Hei ia rā i tō mātou tari, e whakamaharatia ana mātou e tāmate tonu ana te reo Māori, nā reira mā ngā rautaki pēnei ka whakaihi anō i te wairua mō ngā rā e tū mai nei.

“E ora ai te reo me tautoko e te manomano tāngata, ā, e koa ana mātou ki te mahi tahi ki ngā tāngata katoa o Aotearoa kia titi tonu ai te reo Māori ki roto i te ahurea o tēnei whenua ātaahua.”

Mai i te tau 2001, neke atu i te $2.38 miriona tāra i tukuna e Te Taura Whiri hei tautoko kaupapa reo Māori ā-whānau, ā-hapū, ā-iwi hoki ki roto o Kirikiriroa, o Te Kūiti, o Tokoroa, o Whāingaroa anō hoki.

I roto hoki i te rima tau kua pahure ake nei, e 33 ngā rōpū o Waikato i whakawhiwhia ki Ngā Tohu Reo Māori a Te Taura Whiri.

← Back to the news

RSS Feed