Breadcrumbs

Hīkoi Whakangahau mō te Reo Māori

Kei te whakahaere kaupapa rawe Te Taura Whiri i te Reo Māori ā te Rāhina te 11 o Mahuru ki Pōneke Tāone.

E whai ana mātou ki te whakapakari ake i te pai o te Hīkoi Whakangahau mō te Reo i tērā tau, mā te Hīkoi Whakangahau nui ake, pai ake, e whakanui ana i te reo taketake o Aotearoa me te mahi a tēnā a tēnā tangata o Aotearoa hei whakarauora ake i te reo Māori.

Nā reira e pōwhiri ana mātou i a koutou ko tō rōpū kia uru mai ki te Hīkoi Whakangahau nei me tā tātou kaupapa whakanui.

Kei te karanga i ngā rōpū katoa tūmatanui mai, tūmataiti mai, tae atu ki ngā whare wānanga, ngā wānanga, ngā kura, ngā kura kaupapa, ngā rōpū tākaro tamariki, ngā rōpū kōhungahunga, ngā kōhanga reo, ngā rōpū hākinakina, ngā rōpū noa, ngā rōpū kapa haka, ngā marae me ngā hapū puta noa i Te Upoko-o-Te-Ika kia uru mai ki te hīkoi whakangahau nei hei whakamānu hoki i Te Wiki o te Reo Māori 2017.

Ko Te Wiki o te Reo Māori e whakatairanga ana i te take nei he ahakoa ngā āwangawanga mō te pae tawhiti o te reo, i tēnei wā kei te kōrero tonuhia, kei te waiata tonuhia e ngā rau mano tāngata; 130,000 e matatau ana ki te kōrero, e 300,000 kei te ako ki te kura, ā, 10,000 kei ngā taumata whare wānanga. Ka mutu kei te tohu hoki ngā rangahau hou kua hoki haere mai te tuku ihotanga o te reo ki roto i ngā takiwā i tāmate kē ai ia i te ngahurutanga tau 1970.

Ko tōna kaupapa mō tēnei tau kē arā Kia ora te reo Māori he angarua tēnei kōrero ina te kupu mihi rongonui o te motu, ina kē hoki tōna tikanga ‘Kia ora ko te Reo Māori’.

Ka tīmata te hīkoi whakangahau ā te 11 karaka o te ata ki te Tohu Whakamaharatanga Pakanga kei te Kī o Lambton ka haere hāngai ki te Marae o te Tāone kei reira nei he mahi ngahau tae atu ki ngā mahi whakangahau. Ko te whakahau ki ia rōpū whakauru mai kia mahia mai he waka whakangahau, ahakoa he paihikara, he motokā, he wēne, he taraka rānei, ka whakapaipaihia ka whakairiirihia ki ngā tohu tautoko i te reo Māori. Koia rānei ka uru takitahi noa mai, ā-rōpū mai rānei ki te hīkoi whakangahau me te mau tohu whakaatu hoki i tō tautoko mō te reo Māori.

Mō te whakauru mai ki te hīkoi whakangahau nei, tēnā rānei he pātai noa āu, whakapā mai ki tō mātou rōpū whakawhiti kōrero ki comms@tetaurawhiri.govt.nz ka waea mai rānei ki 04 4716 728. Tērā rānei ka rēhita ā-ipurangi mai, rēhitatia mai(external link) kei te tatari atu mātou ki tō whakapā mai.

Nō Aotearoa ake te reo Māori, ā, e whakahau ana mātou i ngā tāngata katoa o te motu (Māori mai, Pākehā mai) ki te whakanui i te reo Māori hei reo mō te motu.

Whakapā mai ki | Contact: Colin Feslier colin@tetaurawhiri.govt.nz  0274 575 676

← Back to the news

RSS Feed