Breadcrumbs

Karahipi whakarauora i te reo Māori

E karanga ana a Te Taura Whiri i te Reo Māori rāua ko Ngā Pae o te Māramatanga kia tukuna mai ngā tono mō ngā karahipi ‘Kia Ita’ kua huaina i tēnei rā.

E rima ngā karahipi e wāriu ana i te takiwā o te $10,000, e huataki ana ki ngā tauira e whai ana i te Tohu Paerua, he pūtea taunaha tēnei e arotahi ana ki te kaupapa whakarauora reo mā roto mai i te whakapakari me te tautoko i ngā kairangahau hei rarau ake i ngā kōrero e tika ana mō te whakarauora reo.

“E tono ana mātou ki te hunga e ngākaunui ana kia haruru te reo Māori ki Aotearoa kia tuku tono mai,” hei tā te Tumuaki o Te Taura Whiri i te Reo Māori, a Ngahiwi Apanui.

“E tāheke tonu ana te hunga matatau ki te kōrero Māori he take nui tēnei, nō reira te tono kia rangahaua te reo me ētahi o ngā huarahi whakarauora ake i te reo Māori,” e ai ki a Apanui.

Ko te tuarua tēnei o ngā tuku karahipi a Te Taura Whiri i te Reo Māori rāua ko Ngā Pae o te Māramatanga, ko te tuatahi o ngā tuku karahipi i tērā tau i te marama o Whiringa-ā-nuku, ka kitea te kī taurangi o Te Taura Whiri i te Reo Māori rāua ko Ngā Pae o te Māramatanga ki te reo Māori me ngā rangahau Māori.

He mea whakahaere ngā karahipi nei e Ngā Pae o te Māramatanga, te Pūtahi Rangahau, ā, he kaupapa tēnei e hāngai ana ki tā rātou e whakatinana ana i roto i te whakapakari i te reo Māori, me ngā mātāpono o te rangahau kaupapa.

E ai ki te Kaiwhakahaere Takirua Ahorangi, a Jacinta Ruru, “nō Ngā Pae o te Māramatanga te maringanui kua punarua anō te mahi tahi i te taha o Te Taura Whiri i te Reo Māori ki te tautoko i ngā tauira whai i te Tohu Paerua. I te tau 2015 i kitea te huhua o ngā kaitono me te pakari o ngā pūkenga, ka noho ko tēnei karahipi hei huataki i ngā tauira whai i te Tohu Paerua.”

“Ko te reo me ngā tikanga Māori te tāhūhū rangahau mō te Pūtahi Rangahau i tēnei tau 2016, ā, e aronui ana mātou ki te whakakaha ake i te honotahi me Te Taura Whiri i te Reo Māori mā roto mai i ngā karahipi nei me ngā kaupapa reo Māori e kitea ai te mahi tahi.”

Anei e hono nei te tono karahipi www.maramatanga.ac.nz/npm-grants(external link)

Kua huaina hoki e Ngā Pae o te Māramatanga ōna karahipi me ōna tuku pūtea tautoko i tēnei rā, e wāriu ana i te takiwā o te $500,000. Ko ēnei pūtea e āhei ana mō ngā Tohu Kairangi, Kaitā Tautoko, Mātauranga Tautoko Ahurea, Huihuinga me ngā Pūtea Tautoko i ngā Tohu Kairangi mō te tau 2016, e tuwhera ana ēnei pūnaha pūtea ki ngā tauira me ngā kairangahau o roto mai i ngā rōpū rangahau 21 o te motu e hono mai ana ki a Ngā Pae o te Māramatanga.

← Back to the news

RSS Feed