Breadcrumbs

Kia ora te reo

Kia ora te reo

Kia ora te reo. Kua whakataungia tēnei ariā hei whakanui i Te Wiki o te Reo Māori e whai wāhi ai i te 11-17 o Mahuru o te tau e tū mai nei.

 

E ai ki te Tumuaki o Te Taura Whiri i te Reo Māori, ki a Ngahiwi Apanui, kua tīkina taua kōrero hei whakarangatira  anō i tēnei mihi taketake nō Aotearoa, hei  whakaahua hoki i te takune o te whakaaetanga ki waenganui i te Karauna me te Māori e pā ana ki te whakarauora i te reo Māori. 

 

“Ka whakaritea e Te Ture mō te Reo Māori 2016 te whakatū whakahaere hou, ko Te Mātāwai, hei ārahi i ngā kaupapa whakarauora ki ngā iwi Māori. Ka hāngai kē atu ngā mahi a Te Taura Whiri i te Reo Māori ki te rāngai tūmatanui me Aotearoa huri noa. Mā tātou katoa e whakaū kia ‘ora’ ai te reo Māori – hei reo hauora anō. Ko te tino take tērā o te mihi ‘kia ora’.

 

Ki tā te kōrero a te Oxford Dictionary of New Zealand, nō ngā tau 1890 tīmata ai te hōrapa haere o te mihi ki waenganui i te Pākehā. Tērā pea tētahi āhuatanga i pērā ai, ko te whakatūnga o tētahi pānui i whakatūramahia  ā-haurehu, ki te Tiriti o Shortland i Tāmaki Makaurau i te tau 1887 hei whakanui i te tiuparī o Kuinui Wikitōria. He mea toro atu i te kanohi o te whare pūkainga taonga o LD Nathan and Son e kī ana, ‘Kia Ora Kuini Wikitōria’. I kitea anōtia te mihi ki ngā ingoa ā-kamupene, ā-pāmu anō hoki.

 

“I tēnei wā tonu, nui atu i te kotahi rau tau ki muri, ka tukuna e te Pirimia, e Richard Seddon, te kāri a te Kirihimete e mea ana, “Kia ora’ me ‘Christmas Greetings” tae atu ki te whakamahi anō i ētahi atu kupu, ariā Māori tonu.

 

“Kei te rahi tonu ngā āhuatanga hei whakanuitanga mā tātou i roto i te hītori me te whakarauoratanga o te reo Māori. Ko te kōrero – Kia ora te reo Māori – te aronga o tērā whakatairangatanga i te tau 2017”.

           

http://archives.govt.nz/gallery/v/Political+Papers/Seddon/Christmas+Cards/Kia+ora/p_0078.jpg.html (external link)

New Zealand Herald 18 July 1887 Page 12 mai i https://paperspast.natlib.govt.nz/ (external link)

← Back to the news

RSS Feed