Breadcrumbs

Me nui ake te tiaki o te reo Māori onāianei i tēnā o mua

“Ko tētahi wāhanga o te whakahōnore i te Tiriti o Waitangi ko te whakaora tonu i te reo Māori mai i te korokoro o te parata,” e ai ki a Ngahiwi Apanui te tumuaki o Te Taura Whiri i te Reo Māori.

“Kei te korokoro o te parata tonu te reo, me kaha ake te hāpai o te hoe e ora tonu ai ia.”

“Ko te tiriti taketake rawa o te motu nei i tuhia ngātahitia ki te reo Māori me te reo Ingarihi – mai anō i te tau 1840 i whai niho ā-ture ai te reo Māori, ā, me pēnei tonu te aro i ēnei rā hei kōkiri tonu i ngā mahi whakarauora i te reo Māori.”

“Ka whakanui nei te motu i te hainatanga o te Tiriti o Waitangi, ko te tūmanako ka whai whakaaro anō rā tātou katoa ki te reo Māori hei taonga mō te motu, ko te wāhi hoki ki te reo ki ngā kura, ki ngā papa hākinakina, ki ngā mahi pāpāho, ki te Paremata, ki ngā mahi pakihi, ā, puta noa i ō tātou oranga.

“Hei taonga te reo mō ngā tāngata katoa o Aotearoa tae noa ki te hunga whakarauora e piki haere nei te tokomaha e mahi ana kia ora tonu ai te reo nei o Aotearoa mō ngā uri whakatupu.”

O ngā tāngata Māori tokorima, kotahi anō tangata e kōrero ana i te reo (21% o te 598,605 tāngata).

← Back to the news

RSS Feed