Breadcrumbs

He $3.2 miriona tāra te pūtea reo Māori e tū mai nei

Kei te ākina ngā toa reo Māori e kaingākau nui ana kia akona, kia arohatia hoki te reo Māori e ō rātou hapori, kia rite mai mō te pūtea whakataetae nei e $3.2 miriona tāra a Te Taura Whiri i te Reo Māori.

“Ka whakatuwherahia ākuanei te wā tuku tono mai mō tēnei pūtea, nā reira ko te hiahia kia kōrerohia ināianei e ngāi Māori ka rēhita mai ai mēnā hiahia ana rātou ki te whai i tēnei ara,” e ai ki a Ngahiwi Apanui te tumuaki o Te Taura Whiri i te Reo Māori.

E tuwhera ana te pūtea whakataetae o Mā te Reo ki ngā iwi, ngā hapū, ngā marae, ngā whānau me ngā rōpū hoki e hiahia ana ki te whakahaere akoranga reo, ki te hanga rauemi reo, ki te whakatū kaupapa reo anō hoki.

“Ko te pūtea nei mō ngā kaupapa ā-takiwā me ngā whakataunga ā-takiwā e rahi ake ai ngā kaikōrero me te taumata o te reo, me te mōhio whānui hoki mō te reo,” e ai ki a Ngahiwi.

”Ahakoa he wānanga whaikōrero, karanga, kaupapa reo motuhake rānei, e whānui ana ngā kaupapa āhei mai ki tēnei pūtea.

Ā te 1 o Hōngongoi 2016 tuwhera ai te wā tono, ā, hei te 31 o Hōngongoi 2016 kati ai.

E motuhake ana te pūtea o Mā te Reo – hei wāhi kōkiri kaupapa reo Māori mā ngā takiwā mō ngā takiwā, hei whai tautoko hoki ki te whakarahi ake i te reo kei ngā rohe.

I roto i ngā tau 15 kua hipa ake nei, neke atu i te 1,600 ngā kaupapa o Mā te Reo i tautokona e Te Taura Whiri tae atu ki ngā rauemi ā-whānau, pukapuka kupu, pukapuka reo ā-iwi, ā-hapū hoki, akoranga reo, wānanga reo, kaupapa kōrero motuhake hoki pēnei i te kōrero pakiwaituhi reo Māori mā ngā tamariki.

Ko te tau 2016/17 te rauna whakamutunga mō Mā te Reo e whakahaeretia ai e Te Taura Whiri hei mua i te whakawhitinga atu o te pūtea nei ki Te Mātāwai.

Ko te hunga ka tono mai me rēhita rawa ā-ipurangi

← Back to the news

RSS Feed