Breadcrumbs

Kua rāhiritia e te Taura Whiri i te Reo Māori he mema hou ki te poari

Kua rāhiritia a Charlie Tepana hei mema hou rawa o te Poari o Te Taura Whiri i te Reo Māori i te rā nei.

"Nō mātou te whiwhi kua tomo mai a Charlie ki roto i tō mātou whare noho ai. Ka tino whai uara ki a mātou tōna mōhiotanga ki te whakaoranga anō o te reo Māori i a mātou e whakatinana ana i te rautaki hou mō te whakapakari i te reo i roto i ngā rāngai tūmatanui, tūmataiti hoki, ā, puta noa i Aotearoa whānui," te kī a te heamana o te Poari, a Wayne Ngata.

"I whai wāhi a Charlie ki ngā mahi whakamīharo ki te whakaora anō i te reo i roto i a Ngāti Raukawa. I te tīmatanga he ruarua anake ngā kaikōrero o te reo, nāwai ā, he mano tini. Nō reira tōna mōhiotanga ki te whakatipu i te reo i rō hapori."

Nō Ngāpuhi, Ngāti Raukawa, Rāngitāne, Te Uri o Hau, Ngāti Rangiwehiwehi, Ngāti Pākehā, Ngāti Kōtimana hoki a Charlie. I puta ia i Te Panekiretanga o te Reo, he mema anō hoki o te Kāhui Whakamāherehere Reo Māori o te tau 2014, tērā i tāpae tūtohutanga he mea whakamana i te Ture Reo Māori hou.

I whakamihi anō hoki a Wayne Ngata i a Te Awanuiārangi Black kua wehe i te Poari whai mai ana i ōna wā e rua hei mema.

"E tūroa tonu ana te ū o ā mātou mema ki te reo me te mōhio anō ka haere tonu taua ū o Te Awanuiārangi ki te whakapakari i te reo i waho i tenei whare, i roto anō hoki i tōna iwi o Tauranga Moana."

← Back to the news

RSS Feed