Te Ture Reo Māori 2016

He mea whakatinana Te Ture i te mahi ngātahi a Te Mātāwai, hei kanohi mā te iwi Māori, me te Karauna.

E whakaū ana te Ture i te nui whakaharahara o te reo Māori mā ngā tāngata o Niu Tireni me te whakahirahira o te reo Māori ki te tuakiri o Niu Tireni. E kī ana:  

  • ko ngā iwi me ngāi Māori ngā kaitiaki o te reo Māori, te reo taketake o Niu Tireni;
  • e tiakina ana te reo Māori hei taonga e te whiti 2 o te Tiriti o Waitangi;
  • ko te reo Māori te tūāpapa o te ahurea Māori, o te tuakiri Māori hoki:
  • ka whakarākei te mōhiotanga me te whakamahinga o te reo Māori i te ao o ngā iwi me ngāi Māori;
  • me whakamahi te reo Māori i ngā mahi whakatairanga i ngā ratonga kāwanatanga ki te marea, i roto hoki i te tuku pārongo ki te marea;
  • he reo hoki ka kaingākautia e te motu; he reo whai mana ā-ture hoki mō Niu Tireni.

Ko tā te Ture

  • he whakatū i Te Mātāwai hei hinonga ā-ture motuhake hei kaiārahi mā ngā iwi, mā ngāi Māori hoki i tā rātou mahi whakarauora ake i te reo Māori;
  • e whakatau kia whakawhanakehia Te Mātāwai me te Karauna kia ahei ai te tautoko i te whakarauoratanga o te reo Māori. Ko te Maihi Māori, ko te Maihi Karauna ēnei rautaki
  • he whakarite i ngā mahi hou mā Te Taura Whiri, Te Māngai Pāho, me te Whakaata Māori.
  • ka whakaū te Karauna i ngā pānga kino o āna kaupapa here o mua, o āna mahi hoki o mua, i roto i ngā whakatipuranga, kāore i āta whai kia tiakina, kia tokona ake hoki te reo Māori, kāore hoki i ākina kia whakapuakina te reo e ngā iwi me ngāi Māori.
  • ka whakapuaki te Karauna i tōna ū kia mahi tahi ki ngā iwi, ngāi Māori hoki ki te āta whai tonu kia tiakina, kia tokona ake hoki tēnei taonga, ko te reo Māori, mō ngā whakatipuranga e haere ake nei.

He whakamārama tēnei whakarāpopoto o ētahi o ngā āhuatanga matua o te Ture. Tēnā mō te taha ki te ture, tirohia koa te Ture tonu.

RSS Feed