Breadcrumbs

Te Wiki o te Reo Māori 2018!

I runga i te mea kotahi marama e toe ana ki te tīmatanga o Te Wiki o te Reo Māori, kua whakaputaina e Te Taura Whiri i te Reo Māori he rangatū pānui whakaahua e whakanui ana i tōna kaupapa mō te tau ‘Kia Kaha te Reo Māori’.

Kei tētahi o ngā pānui whakaahua ko te arapū Māori i te reo rotarota. E whakatairanga ana tētahi atu o ngā pānui whakaahua ko ngā kupu e whai ake nei, arā, ko te ako, ko te whakarongo, ko te waiata, ko te pānui, ko te tuhi, ko te kōrero. Ka pātata atu ana ki te wiki o te 10-16 o Mahuru 2018 ka whakaputaina anō ētahi atu rauemi.

 “E mōhio pai ana a Aotearoa whānui ki te kōrero ‘Kia Kaha’, me tōna tikanga Māori tika, he mea whakahau i te tangata ‘kia māia, kia tū pakari’

Ehara i te mea ko Te Wiki ō te Reo Māori anake hei te marama o Mahuru, engari anō ko ngā ngohe, ko ngā kōkiri matua hoki. Ko te 14 o Mahuru te Rā o te Reo Māori, he whakamaumaharatanga ki te rā i te tau 1972 i whakatakotohia te petihana mō te reo Māori ki te aroaro o te whare pāremata. Otirā koirā hoki te marama e whakanuia anō ai te reo Māori e te tini māioio ki te kaupapa Mahuru Māori(external link) mā te kōrero reo Māori anake (paku reo Māori rānei) mō te roanga atu o te marama.

E kī ana te Tumuaki o Te Taura Whiri I te Reo Māori, a Ngahiwi Apanui “e mōhio pai ana a Aotearoa whānui ki te kōrero ‘Kia Kaha’, me tōna tikanga Māori tika, he mea whakahau i te tangata ‘kia māia, kia tū pakari’. He wā anō ka kōrero tātou mō te reo anō nei he tangata, ka kōrerohia te hauora, te kaha me te whakarauoratanga o te reo. Nō konā e whakatenatena ana te pepeha nei ‘Kia Kaha te Reo Māori’ i a tātou katoa ‘kia whakapakari ake i te reo Māori”.

“Ka ahu mai te pakaritanga o tētahi reo mōrearea i te nui o tōna mana; i te noho mārama o te iwi whānui me pēhea te tautoko i te mahi whakarauora reo; i te ako me te kōrero a te mātinitini i te reo; me te noho mai o ngā kupu katoa e tika ana e taea ai ngā kaupapa kōrero katoa te kawe ki taua reo.”

Anō te kaha, me te ngoi o ngā tāngata katoa o Aotearoa ki te whakakaha ake i te reo Māori. Kua tatū ngā rā, kua tatū anō te kaupapa whāiti mō tēnei tau, ā, ko te tūmanako kia ngaringari ake ngā whakahaere, ngā kamupene me ngā rōpū i te hapori kia āta manaaki mai i Te Wiki o te Reo Māori 2018.

Kia kaha rā tātou!

Whakapā mai ki: Colin Feslier colin@tetaurawhiri.govt.nz 022 049 1416

 

Te Taura Whiri i te Reo Māori LogoKia Kaha te Reo Māori Logo 2018

 

← Back to the news

RSS Feed