Breadcrumbs

E ono ngā hīkoi whakanui hei Te Wiki o te Reo Māori Mahuru 10-16

Hei te marama e tū mai nei ka puta te tini me te mano ki ngā tiriti ki te whakanui i ngā hīkoi whakanui i Te Wiki o te Reo Māori me ngā momo ngohe, mahi anō ki te whakanui i te reo o te whenua i raro i te kaupapa ‘Kia Kaha te Reo Māori!’

I runga i te angitū o ngā hīkoi whakanui i te reo Māori i tū ki Te Whanganui-a-Tara i ngā tau e rua kua hori ake nei, e ono anō ngā hīkoi whakanui, ngā ngohe whakanui rānei ka tū – ki Tūranga, ki Manukau, ki te puku o Tāmaki Makaurau, ki Te Raki Paewhenua otirā, ki Rotorua ki Te Whanganui-a-Tara anō.

Ehara i te mea ko Te Wiki o te Reo Māori anake hei te marama o Mahuru, engari ka tū anō he ngohe, he kōkiri matua anō hoki.

Ko te Rā o te Reo Māori ko te 14 o Mahuru, he whakamaumaharatanga ki te rā i te tau 1972 i whakatakotohia te petihana mō te reo Māori ki te aroaro o te whare pāremata. Otirā koirā hoki te marama e whakanuia anō ai te reo Māori e te tini māioio ki te kaupapa Mahuru Māori mā te kōrero reo Māori anake (paku reo Māori rānei) mō te roanga atu o te marama.

Ko tā te Tumuaki o Te Taura Whiri i te Reo Māori a Ngahiwi Apanui, he ara whakanui i te reo Māori ngā hīkoi mā ngā tāngata katoa.

“He nui noa ake te kaupapa whakarauora i te tangata e ako noa iho ana i te reo Māori. He mea pōwhiri kē mai i te reo Māori ki ngā taiao tūmatanui.

“Kia kaua te reo Māori e ora ki te marae, ki te Whakaata Māori, ki te reo irirangi me ngā kura anake. Engari me kite, me rongo te reo i ngā wāhi e tika ana māna – arā, ki ngā wāhi katoa!

“Ka taea e ngā tāngata katoa o Aotearoa te whakapakari ake te reo Māori. Haere mai ki tētahi hīkoi whakanui, mātakitaki rānei, tautokona te reo Māori!”

“Kia kaha rā tātou!”

Whakapā mai ki | Contact: Colin Feslier colin@tetaurawhiri.govt.nz 022 049 1416

← Back to the news

RSS Feed