28 Hune 2004

Kei runga rawa Te Taura Whiri mō ngā Mahi Hangarau a Te Kāwanatanga

Kua whakawhiwhia Te Taura Whiri i te Reo Māori ki te Paraihe whai mana e mōhiotia nei ko te Paraihe o Computerworld mō te Kairangi Whakamahi Hangarau Mōhiohio i ngā mahi Kāwanatanga mō te tau 2004, mō tāna pūnaha pātengi papakupu e mōhiotia nei te Mātāpuna Dictionary Database System.

Kei te whakaemia te papakupu Māori hou a Te Taura Whiri ki te pūnaha Mātāpuna nei. Kotahi anō te reo o te papakupu - ka tuhia katoatia te pukapuka ki te reo Māori, mai i mua ki muri. Ka taea hoki ngā pukapuka te tā-ā-kōnae ki te ipurangi, i raro i tēnei pūnaha.

I kī a Haami Piripi, kaiwhakahaere matua o te Taura Whiri i āna kupu whakamihi ki te hunga tuku i te paraihe, he wāhi nui tonu tō tēnei pūnaha hangarau mōhiohio i roto i ngā mahi whakarauora i te reo Māori i te mate ā-moa.

E ai ki te kaihoahoa, te kaiwhakawhanake i te pūnaha, ki a Dave Moskovitz, he rerekē tēnei pūnaha i ētahi, i te mea he ngāwari ki te tangotango, he tāwariwari, ā, he wātea ki ngā tāngata katoa i raro i tōna Raihana Wātea, e mōhiotia nei he Open Source Licence. "Mā roto i te whakamahi i tēnei pūmanawa rorohiko, ka tino ngāwari kē atu te mahi whakaemiemi papakupu. He mea tino nui tēnei mō ngā reo rawakore nei, kāore e tino nui ngā moni āwhina". "Ehara i te mea me tohunga rawa koe, nā te mea he ngāwari ki te rahurahu, he ngāwari hoki ki te whakahaere," e ai ki a Moskovitz. "Ka tino kitea pea he hua mō ngā reo e whakaekea ana puta noa i te ao, tae atu hoki ki te reo Māori, i tēnei pūnaha." "He tuatahitanga anō tēnei mō ngā uri o Māui-atamai, e kiia nei 'Kiwi ingenuity."

He mea nui ki te rōpū o te Mātāpuna i kōwhiria tā rātou kaupapa hei toa, i waenganui i ngā kaupapa katoa o te Kāwanatanga. He pakari tonu ngā Tari i whakataetae, pēnei i te Tari Taake, me te Institute of Geological and Nuclear Sciences i uru nei ki ngā whiriwhiri whakamutunga.

Ko ngā Paraihe a Computerworld mō te Kairangi o te Whakamahi i te Hangarau Mōhiohio hei whakanui i ngā mahi hou, i te matawhānui o te titiro, i ngā pūkenga, me te mātauranga o ngā kaimahi ngaio i roto i ngā mahi hangarau mōhiohio, i runga i te whakaaro me whakanui ā rātou mahi ka tika. He mea tautoko te wāhanga Kāwanatanga o ngā paraihe i tēnei tau e te kamupene Unisys.

Mēnā he pātai, whakapā atu ki a:
Te Kaiwhitiwhiti Kōrero
Te Taura Whiri i te Reo Māori
media@tetaurawhiri.govt.nz
Tel: 04 4716 724

ki runga