|
7 Hakihea 2001
Mā ngā tatauranga hou e āwhina kia hāngai ai ngā whakapaunga moni mō
te Reo Māori
Mā ngā raraunga i tukuna i te rā nei e āwhina kia hāngai ai ngā
whakapaunga moni ki ngā wāhi matua me ērā atu wāhi me tautoko - kia pakari,
kia puāwai ai te reo Māori, ē ai ki a Haami Piripi, Te Kaiwhakahaere Matua o
Te Taura Whiri i te Reo Māori.
He takitaro ngā putanga o te rangahau e pā ana ki te oranga o te reo Māori
i puta i te rā nei, ā, he nui tonu ngā tātaritanga me ngā mahi rangahau kei
mua, hei tautuhi, hei kawe hoki. Ko tā mātou mahi, me te mahi ā ētahi atu
kei roto i te mahi whakaora i te reo, he whakamahi i ngā tatauranga kia whai
hua, kia hāngai hoki ki te Māori. Ko te tūmanako ka tātaritia e ngā
kairangahau Māori ēnei pārongo hou kua puta, mā runga i te kaupapa pou tarāwaho
Māori, me te hanga anō i ā rātou ake mahere reo kia pūmau ai te pakari
haere o te reo Māori.
"I roto i ngā mahi rangahau ka puta mai i te tatauranga, he hōhonu
tonu ngā whakataunga mō ngā kaupapa here e pā ana ki ngā whanaketanga
kaupapa here reo Māori me ngā rawa hei whakakapi i te hapori whānui me te kāwanatanga,
i ngā rā e tū mai nei.
E kitea ana, ko ngā hapori whānui tonu ngā rōpū hāngai hei āwhina mō
ngā whanaketanga reo. Waimarie te putanga o ēnei pārongo i te mea, i tēnei wā
tonu e whakatau ana mātou i ngā paearu mō te whakahaere i te $15 miriona
takuhe reo hapori, a tērā tau.
Ko te tikanga o te takuhe nei, kia hāngai tonu te āwhina i ngā hapori Māori,
kia mau ai rātou ki te rangatiratanga o ā rātou ake whanaketanga reo Māori.
Ehara mā te hoatu noa iho engari mā te āta āwhina kia eke ai te reo hei reo
tuatahi anō mō te iwi Māori.
Ki taku mōhio ka whai rara anō ngā raraunga nei mō te ratonga pouaka
whakaata Māori kua whakatūhia ake nei, mō ngā reo irirangi Māori me te
hunga pāpāho Tā. Tērā pea ka kitea he tauira rerekē. E koa ana mātou mō
ngā ahuatanga katoa o te rangahau nei na te mea, mā tēnei mātou e āwhina
kia tōtika ai ā mātou whakaaro, kia ruruku ake ai ā mātou mahi e pā ana ki
ngā mahi maherehere reo i ngā taumata mataiti, matanui hoki.
Ka mutu
Mēnā he pātai, whakapā atu ki a:
Kaiwhitiwhiti Kōrero
Te Taura Whiri i te Reo Māori
Waea: 04 471 0244
Waea Whakaahua 04 4712768
media@tetaurawhiri.govt.nz
www.tetaurawhiri.govt.nz
ki runga
|
