Kāinga > Tukunga Pāpāho >

3 Haratua 2002

Ko te reo Māori te reo tuarua e kōrerotia whānuitia ana

Ko te reo Māori te reo tuarua e kōrerotia whānuitia ana i Aotearoa e ai ki ngā tatauranga kātahi anō ka puta.   

“Ko tā mātou matakite i Te Taura Whiri i te Reo Māori, ko te reo Māori hei reo tuatahi mō ngāi Māori, nā reira e harikoa ana mātou i ēnei tatauranga. Kei te noho pūmau tonu mātou ki te āwhina i ngā whānau, i ngā iwi, i ngā hapori, i te kāwanatanga me ngā pākihi ki te whakarite me pēhea rātou e whakawhānui i te kōrerotia o te reo Māori,” e ai ki a Haami Piripi, Kaiwhakahaere Matua o Te Taura Whiri i te Reo Māori.  

Kei te whakatau ēnei rarauranga i ngā kōrero takitaro i tukuna i te marama o Hakihea 2001, me te nui ake o ngā taupori reo Māori ā-rohe. Ka āwhina atu tēnei i ngā whakatau me pēhea te tohatoha pütea me ngā rauemi mō te reo Māori ki ngā hapori. 

“He pai ēnei kōrero mō ngā mātua, mō ngā iwi, mō ngā kairangahau, mō ngā tauira, mō ngā kaiako, me ngā tari kāwanatanga hoki e hiahia ki te mōhio, kei hea te reo e kōrerotia ana, ā, e kōrerotia ana ki a wai i roto i ngā kāinga huri noa..

Kāore e roa, ka kite tātou i tētahi tauira hou hei tautoko i te whakamahia o te reo Māori. Ka piki ake hoki te hiahia mō ngā ratonga reo Māori, me ngā mahi whakamāori ā-tuhi, ā-waha hoki. . 

Pānuitia mai te pūrongo me ngā tatauranga whakamutunga e pā ana ki ‘He Tirohanga Ki te Oranga o te Reo Māori’ i runga i te pae tukutuku a Te Taura Whiri i te Reo Māori , i te pae tukutuku a Te Puni Kōkiri, i te pae tukutuku rānei a Te Tari Tatauranga. 

Ka mutu Mō ētahi atu kōrero, whakapā mai ki a:

Kaiwhitiwhiti Kōrero
Te Taura Whiri i te Reo Māori 
Waea: 04 471 0244
Waea Whakaahua 04 4712768
media@tetaurawhiri.govt.nz
www.tetaurawhiri.govt.nz  

ki runga