Breadcrumbs

Ka whakanuia ngā toa reo Māori ki ngā tohu o te motu

Ko te kaitirikohu waehere ki te reo Māori, ko te tangata whakatū wānanga mō ngā ritenga ture reorua i roto i ngā tau, ko te tangata kua whakapau tautini i ōna kaha ki te whakaora i te reo Māori, koia nei ētahi o ngā whakahirahira kua eke ki ngā whiringa toa o te tekau mā whā o Ngā Tohu Reo Māori a Te Taura Whiri i te Reo Māori kua pānuitia i te rā nei.

E rua tekau mā toru ngā kaiwhakataetae whiringa toa mai i ngā kaiwhakauru 100 koni atu – ko te tokomaha rawa tēnei mai anō i te tīmatanga o ngā tohu i te tau 2004. Ko te hui whakahōnore ka taurimahia e Te Taura Whiri i te Reo Māori i tēnei tau, ka tū ki Te Papa ā te 24 o Whiringa-ā-rangi.

E ai ki te Tumuaki o Te Taura Whiri i te Reo Māori, a Ngahiwi Apanui, kua eke taumata anō ngā

kaiwhakauru mō te hiranga me te kounga o te reo Māori. “He kaupapa nui ngā tohu nei ki te maramataka mō te reo Māori; i tua atu i te whakanui i ngā kaupapa i kawea i te tau, he wāhi hoki ki te whakanui i te hunga e roa ana tō rātou ū ki te whakarauora i te reo Māori.”

Ko ngā karangatanga whakataetae i tēnei tau, ko ngā tohu mō ngā tāngata takitahi, mō ngā rōpū anō hoki, i roto i ngā mahi toi me ngā mahi whakangahau, ngā whare mātauranga, te ao pakihi, tae atu ki ngā tāngata me te mahi pāpāho.

Toronga pāpāho

Colin Feslier 022 049 1416 colin@tetaurawhiri.govt.nz

← Back to the news

RSS Feed