Kua neke atu i te 25 tau e tautokohia ana e Te Taura Whiri i te Reo Māori, arā, e te pūtea a Mā te Reo, ngā kura whakapakari reo rumaki i ngā marae.

Kura Reo Whakapakari Reo

Ko ngā Kura Reo Whakapakari Reo nei he kura mō te motu whānui, e arotahi ana ki te whakapakari i te reo i ngā hapori. He kaupapa tēnei i whakatūria e Te Taura Whiri i te Reo Māori, i whakaakona hoki e ia i mua. I whakatūria ngā Kura Reo nei kia noho mai ai he kura e rumakina aite tauira kua ngākau titikaha ki te whakawhiti whakaaro ki te reo. Ko te aronga nui o te kaupapa ko te whai kia ekea te hiranga ina rumakina te tangata mō te rima rā i tēnā, i tēnā akoranga. E rima ngā kura pēnei e whakahaeretia ana i te tau, i te whānuitanga atu o Aotearoa.

E tuwhera ana ngā Kura Reo ki te hunga e hiahia ana kia noho te reo Māori hei reo whakaako mō rātou, hei reo kōrerorero i ia rangi. Ko tōna whāinga matua ko te whakapiki ake i te whakamahia o te reo, ki te whakapakari hoki i te reo o te hunga kōrero Māori. Ka tīmata ake ngā kura nei ki te pōwhiri i te ahiahi o te Rātapu, kua whai iho ko te rēhita i te tangata. Ka haere ngā akoranga i te ata o te Rāhina, ka hiki ā te ahiahi o te Rāpare, kua tukua te hākari.

I te mea he kura rumaki ēnei, arā, ko te reo Māori anahe te reo o te kura, me āhua matatau tonu te hunga ka tae ake kia āhua mārama tonu ai ki ngā kaupapa e whakaakona ana. Kei tōna 120 ngā tauira o ngā kura, waihoki he āwhina kei reira mō te hunga e whai ana:

  • kia kaha ake tā rātou whakamahi i te reo Māori, kia pakari ake ngā reo, kia rite ai ngā reo mō ngā kawenga ā-pāpori, ā-tikanga.
  • kia mārama ki ngā kura huna o te reo, hei tauira, te whakamahi i te whakataukī, i te kīwaha, i te kīrehu.

Ka tohaina he pukapuka mahi ki te tauira, ka whakaurua hoki tēnā me tēnā ki te kāhui e rite ana ki tōna taumata reo. I ngā ahiahi, kua haere he kaupapa mā te katoa pērā i te wānanga i ētahi kaupapa, te whakaako waiata, te mahi ngahau. Kua oti kē ngā kaupapa ka whakaakona i ngā Kura Reo te whakarite, he kaupapa kē, he aronga ako reo kē, ka mahi ā-rōpū iti ki te ako i ngā mahi reo mō:

  • te wetereo
  • te aroā
  • te whakamāori/whakapākehā
  • te whakapuaki whakaaro ki te reo Māori
  • te kīwaha, te kīrehu
  • te pakiwaitara
  • te kōrero
  • te whakataukī, tōna tikanga, me pēhea te whakamahi.

He kāhui pūkenga reo tō ngā Kura Reo, he pūkenga pērā i a:

  • Tākuta Tīmoti Kāretu – Ngāi Tūhoe
  • Tākuta Wharehuia Milroy – Ngāi Tūhoe
  • Paraone Gloyne – Ngāti Raukawa
  • Jarred Boon – Ngāti Maniapoto, Ngāti Raukawa
  • Ngāringi Kātipa – Waikato
  • Pānia Papa – Waikato
  • Pakake Winiata – Ngāti Whakaue, Ngāti Raukawa, Ngāti Awa
  • Leon Blake – Tūhoe, Te Arawa, Ngāti Porou, Ngāti Whāwhākia, Ngāti Kahungunu, Taranaki, Te Whānau-a-Apanui
  • Charlie Tepana – Ngāti Raukawa

Hei hari atu māu

Me hari e te tangata ōna hanga whaiaro mō te rima rā. He whakahau hoki tēnei kia haria ake anō he pene, he pepa, he rorohiko pona, tae atu ki ēnei papakupu:

  • A Dictionary of the Māori Language by Herbert Williams
  • Complete English-Māori Dictionary by Bruce Biggs.

Te Utu

Mō te utu ki te tangata i tēnā, i tēnā Kura Reo, whakapā hāngai atu ki ngā kaiwhakahaere o ngā kura reo e rima, kāore hoki he pānga ki Te Taura Whiri i te Reo Māori mō te taha whakahaere.

He whakamārama: Ko tā tō moni rēhita he utu i ō kai, i tō noho, i ngā akoranga me te pukapuka mō te kura. Māu tonu e pīkau tō haere atu me tō hoki ki te kāinga.

 

Ngā Rā

Kei raro iho nei ngā kaiwhakahaere Kura Reo e rima me ngā rā e tū ai ngā kura mō te tau 2015/16. Māu tonu e kite iho ka tū ngā Kura Reo i ngā hararei a ngā kura.

Ngā Rohe Kura Reo

Kōrero whakapā mō ngā Kaiwhakahaere o te Rohe*

Ngā rā mō te 2016

Ōtaki

Leon Blake – Kounga Ltd

Otakikurareo@gmail.com

 

10 - 14 Hōngongoi

Rotorua

Scotty Morrison – Meka Media Ltd

Angitu@xtra.co.nz

Kura-Reo-ki-Rotorua-2016-Notification2.pdf

25 - 29 Mahuru 2016

Heretaunga

Jeremy MacLeod – The Waimārama Māori Committee

Jeremy@kahungunu.iwi.nz

 

Kāore anō kia whakatauhia te rā

Te Waipounamu

Paulette Tamati-Elliffe – Te Rūnanga o Ngāi Tahu

Paulette.tamati-elliffe@ngaitahu.iwi.nz

17 – 22 Paengawhāwhā, 2016

Tokoroa

Louis Armstrong – Raukawa Charitable Trust

Louis.Armstrong@raukawa.org.nz

 Poster-Rau-Ahurea-Kura-Reo-April-2016-V5-FOR-WEB2.pdf

25 – 29 Paengawhāwhā, 2016

*Mō te roanga atu o ngā kōrero, whakapā hāngai atu ki te Kaiwhakahaere o te Rohe.

 

RSS Feed