Kua whakaterea Te Wiki o te Reo Māori 2019 e te Kāwana Tianara

I te mea 40 noa iho ngā rā e toe ana, i whakaterea Te Wiki o te Reo Māori 2019 e te Kāwana Tianara a Kahurangi Patsy Reddy, he Māngai Reo Māori.

Me ngā kupu akiaki o te waiata a Ngoi Pewhairangi i tukua e ia te manu nei kia rere: Whakarongo.

Whiua ki te ao!
Get it out to the world!

Whiua ki te rangi!
Project it to the skies!

Whiua ki ngā iwi katoa!
Reach all peoples!

I mua i te tokomaha i hui ki Te Wharewaka o Pōneke, i kōrero a Kahurangi Patsy, Te Minita Whanaketanga Māori a Nanaia Mahuta me ngā Māngai Reo Māori a Guyon Espiner rāua ko Pere Wihongi e pā ana ki ō rātou wawata mō tō tātou reo taketake ā ngā tau e haere ake nei.

He kaupapa nui Te Wiki o te Reo Māori i te maramataka o Aotearoa, e tipu haere ana mai i te porotēhe i ngā tau 1970 ki te kaupapa ā-motu e whakanuia ana e ngā kura, ngā wāhi mahi, ngā rōpū hapori me ngā tāngata takitahi huri noa i te motu.

I tēnei tau ka hīkoi whakanui anō te iwi ki ngā tāone nui hei whakahoki i te wairua whakarauora ki ngā tiriti.

Hei tā Ngahiwi Apanui, Tumuaki o Te Taura Whiri i te Reo Māori, he kaupapa Te Wiki o te reo Māori me te reo Māori mā ngā iwi katoa e noho nei ki Aotearoa.

“Kei te manawa o tō tātou tuakiritanga ā-motu, tō tātou Aotearoatanga te reo Māori. Kāore e kō atu i te kōrero Māori ki te whakaatu, nō Aotearoa ahau.”