E whakamihi ake ana a Te Taura Whiri i te Reo Māori ki te hunga neke atu i te tahi miriona te rahi o Aotearoa, i whakakotahi mai rā ki te whakanui i te reo Māori i te wā kotahi.

“Koinei te whakanuitanga nui katoa mō te reo Māori. Kāore anō kia pēnei rawa te rahi o te hunga e whakanui ana i te reo i te wā kotahi,” te kī mai a te Toihau o Te Taura Whiri i te Reo Māori, a Ahorangi Rawinia Higgins.

“Ko te kupu whakamihi tēnei ki a rātou puta noa i Aotearoa me te ao, mai i ngā taone iti ki ngā auahi nui, mai i ō tātou kaumātua ki ā tātou pēpi i tūhono mai rā i te rangi nei.”  

He tohu whakamahara te Wā Tuku Reo Māori ki te haora me te rā i whakatakotoria ai e te kōiti o rangapū te Petihana Reo Māori ki te whare pāremata i te tau 1972.

I kitea i te pae ipurangi ka whai-waitohu, kua neke atu i te 500,000 te rahi o ngā tāngata i hono mai i ngā rangi e toru kua pahure ake nei. I te haora whakamutunga i mua i te 12 karaka i te ahiahi, ka kōpā rawa ngā pae ipurangi a te komihana me te Zuimano, i te kaha pātono mai a te iwi.

“I kōpā rawa te whare mariko i te kuhunga mai o te tokomaha ake i te kotahi miriona toa ki te whakanui i te reo i tō mātou taha. Ahakoa rā, i whai wāhi te katoa, ki te whakanui tahi i te reo Māori,” te kōrero mai a te Tumuaki o Te Taura Whiri i te Reo Māori, a Ngahiwi Apanui.

“E ngana tonu ana ētahi ki te takiuru mai ki te whakamōhio mai i whai wāhi rātou: nā te mea kāore i mau ō rātou ingoa i te nganatanga ki te waitohu mai i tēnei ata.”

I tū te wā tuku reo, kātahi anō ka puta, hei urupare mā te komihana ki a KOWHEORI-19: he huarahi e noho haumaru ai te iwi, me te whakarauika i a rātou.

He mano ngā kaupapa puta noa i Aotearoa e whakanui ana i te reo Māori.

 Mā te pae ipurangi hou o www.reomaori.co.nz e tautoko ngā ākonga reo Māori i te roanga o te tau.

 Otirā ka tū tonu te pae ipurangi o te Wā Tuku Reo Māori i www.tuku.reomaori.co.nz, hei tūhonotanga mai mō ērā kīhai i waitohu mai i mua i te 12 karaka i tēnei ahiahi. Atu ki tēnei wā, 1,023,751 te rahi o ngā tāngata kua whakaari mai i ā rātou Wā Tuku Reo Māori.