"Kia Kaha te Reo Taiao", he rauemi hou me Te Papa Atawhai

E hui tahi ana a Te Taura Whiri i te Reo Māori me Te Papa Atawhai ki te whakaputa i tētahi rauemi ako hou, tino whakahirahira nei ‘Kia Kaha te Reo Taiao’, hei whakanui i Te Wiki o te Reo Māori 2018.

He tuatahitanga tēnei i waenga i ēnei tari Karauna e rua, i whakatau rātou kia pēnei ai te mahi tahi nō te kitenga e hāngai ana ā rāua tino kaupapa whakanui e rua.

Kei roto i tēnei pukapuka ko ngā kōrero mō te whakahuatanga, mō ngā kīanga o ia rā otirā ngā ingoa o ngā momo. Tae atu anō ki te tātai arorangi Māori, te wai māori, te ao o Tangaroa, te wao nui a Tāne, te Tini a Tāne me te Tikanga Hauora ā-Waho.

E kī ana te Kaiwhakahaere Rangapū Rautaki a DOC a Joe Harawira, he tika hoki te mahi tahi ina titiro te tangata ki te ngako o ngā kaupapa e rua.

“Ko te reo Māori te mauri o te Ao Māori, ā, e mihi tonu ana a Te Papa Atawhai ki te whakaaro tuku iho he mea nui te kaitiakitanga, hei reo mō te taiao, waihoki, mō te ao tūroa.

“Ko te noho mōrearea o te reo Māori me ngā reo o te taiao he mea paihere anō i a tātou, i tō tātou kaingākau kia ngākau tahi ā tāua mahi."

Mai i te 10-16 Mahuru Te Wiki o te Reo Māori i tēnei tau me tōna pepeh~a ‘Kia Kaha te Reo Māori‘.

E kī ana te Tumuaki o Te Taura Whiri i te Reo Māori, ā Ngahiwi Apanui “e mōhio pai ana a Aotearoa whānui ki te kōrero ‘Kia Kaha’, me tōna tikanga Māori tika, he mea whakahau i te tangata ‘kia māia, kia tū pakari’.

“He wā anō ka kōrero tātou mō te reo anō nei he tangata - ka kōrerohia te hauora, te kaha me te whakarauoratanga o te reo. Nō reira e whakatenatena ana te pepeha nei ‘Kia Kaha te Reo Māori’ i a tātou katoa ‘kia whakapakari ake i te reo Māori”

Ka tū Te Wiki Atawhai Taiao mai i te 15 ki te 23 o Mahuru, ā , e whā ōna kaupapa: ko ngā kaupapa o te rauemi ako ‘Kia Kaha te Reo Māori’ ko Te Wao nui a Tāne; Te Tini a Tāne; Te Ao a Tangaroa me Te Wai Māori.

Kāore he utu o te puka ‘Kia Kaha te Reo Māori’ tīkina atu i tētahi o ngā hīkoi whakanui e haere ana i Te Wiki o te Reo Māori, haere rānei ki te pokapū manuhiri o DOC e tata ana ki a koe, tīkina ake rānei i konei.