Kua tuwhera te whakaurunga mai ki Ngā Tohu Reo Māori ā-tau. Ka whakahōnore, ka whakanui Ngā Tohu Reo i ngā tāngata, i ngā rōpū hoki e tautoko ana i te whakarauoratanga o te reo Māori.
Ahakoa ko wai ka taea te tuku ingoa, kia whakaingoatia rānei te tangata tae atu ki te wehenga ruatanga o te Pōtapu te 10 o Whiringa-ā-rangi 2019.

Ka tū ngā tohu whakanui ki tētahi hākari i Tāmaki Makaurau ā te Pōmere te 6 o Hakihea 2019.

Ko ngā wāhanga e wātea ana ko te:

1.  Iwi | Tribe

2. Whānau | Family

3. Hapori – Māori community revitalisation initiatives

4. Aotearoatanga | New Zealand Community

5. Rangatahi – revitalisation targeting or led by rangatahi

6. Mātauranga – Kaupapa Māori | Education – Māori Medium

7. Mātauranga – Whānui | Education – Open

8. Kāwanatanga | Government

9. Pakihi | Business

10. Te Mahi Toi, Te Mahi Whakangahau | Arts and Entertainment

11. Hākinakina | Sports

12. Ngā Mahi Pāpāho | Broadcasting and Media

13. Te Wiki o te Reo Māori | Māori Language Week

I tua atu, ka tukua pea ngā tohu mō:

14. Te Tohu Huia i te Reo  – Supreme

15.Te Hau Kōrurenga  – Culture Change

16. Te Tohu Oranga Angitu - Lifetime Achievement

 
Ka tirohia ia tono i raro i ngā āhuatanga e rima o te whakarauoratanga, he wāhanga tērā o ngā rautaki whakarauora o te Karauna, me te Iwi Māori (ko Te Mātāwai tōna māngai).

Anei aua āhuatanga, ko te Mana, ko te Mārama Pū ki te Whakaora Reo, ko te Ako i te Reo, ko te Kōrerotanga o te Reo, ko te Puna Reo.

Nō te tau 2004 kua whakanuia Ngā Tohu Reo Māori i ia tau, i ia tau, ā, neke atu i te kotahi rau ngā tono ka tae mai i ia tau.

E kī ana te Tumuaki o Te Taura Whiri i te Reo Māori a Ngahiwi Apanui e haere ngātahi ana ngā tohu o tēnei tau me Te Tau o ngā Reo Taketake o te Ao (IYIL 2019).
“Kua rongo te ao i ā mātou mahi whakatairanga i te reo Māori, ā, e ako ana anō hoki mātou i ngā mahi whakanui reo ā ētahi atu.

Kāore i tua atu, kāore i tua mai i te angitu o tā tātou Wiki o te Reo Māori i tēnei tau, i hōrapa tōna rongo ki te tini me te mano o tātou a ngāi Aotearoa.  E hāngai ana te titiro ki tā mātou whāinga o te kotahi miriona tāngata e kōrero Māori ana hei te tau 2040”.

“Me whakanui ō tātou Toa Reo Māori. Kaua e whakamā! Mehemea kei te mōhio koe ki tētahi tangata, tētahi whakahaere rānei e tika ana kia whakanuia, tono mai ināianei ki tā mātou paetukutuku”.