Ngā rā e tū ai Te Wiki o te Reo Māori 2021
I ia rā, e heke haere ake ana te hunga ātete i te reo Māori. Koinei te kī a Te Taura Whiri i te Reo Māori i te pānuitanga o ngā rā e tū ai Te Wiki o te Reo Māori i tēnei tau.
“Ahakoa e kirikawa tonu ana ētahi o Aotearoa ki ngā panonitanga, he tokoiti rātou e heke haere ana hoki te tokomaha i ia rā,” te kī a te Toihau o Te Taura Whiri i te Reo Māori, a Ahorangi Rawinia Higgins.
“I tērā tau i tū te kaupapa reo Māori nui rawa, ā, kotahi haurima o te taupori, neke atu i te kotahi miriona tāngata te tokomaha o ngāi Aotearoa i tatū mai ki te whakanui i Te Wā Tuku Reo Māori.
I whakaūngia e Toihau Higgins ngā rā mō Te Wiki o te Reo Māori i tēnei tau, atu i te 13 ki te 19 o ngā rā o Mahuru 2021. Ko te 49 tau hoki tēnei i te wā i whakatakotohia ai te petihana ki mua i te aroaro o te pāremata, kia akona te reo Māori ki ngā kura.
I ēnei wiki ruarua kua pahure ake nei, kua kitea te tokomaha o ngā kaiārahi tūmatanui, tūmataiti hoki, e tū ana ki mua i te motu whānui ki te tautoko i te reo: pērā i te Tumu Whakarae o Vodafone, a Jason Paris, te whakahaerenga pāho o NZME, te Mana Whanonga Kaipāho, me te Kaunihera Hunga Pāpāho.
“E ai ki te tatauranga a Colmar Brunton i te Hakihea kua hipa, i oti te whakatau i te 8 o te 10 tāngata o ngāi Aotearoa, he wāhanga te reo Māori o tō rātou tuakiri ā-motu, ka mutu, me poho kererū hoki ka tika.”
“Ka mānawa atu nei ki ngā urupare a ngā kaiārahi pakihi, kāwanatanga hoki ki ērā kei te hiahia tonu nei ki te pana atu i te reo taketake ake o Aotearoa.”
Ka mānukanuka ia i te kore tahuri mai o taua hunga rā me te kite tonu atu he ara whakakotahi te reo Māori i ngā iwi o Aotearoa i runga i te rangimārie.
“Ehara tātou i te paruhi, engari, ki te whakatauritehia ki ērā atu whenua e raru tonu nei, kei tua noa atu tātou i ngā wā o mua, ka mutu, ko te reo Māori tētahi wāhanga nui tonu o taua panonitanga.”
Kia kaha te reo Māori!
Kia kaha hoki ngā iwi o Aotearoa!
Hononga whaipānga:
- Rauemi mō Te Wiki o te Reo Māori 2021