Te pakanga a Aotearoa mō te reo Māori: E pōhiritia ana ngā kōrero

E pōhiri ana a Te Taura Whiri i te Reo Māori kia āwhinatia tā rātou whakaemi i ngā kōrero, i ngā whakaahua me ngā mahara e whakapapatia ai te pakanga kia whakamāuitia te reo Māori. 

“Kua hia nei ngā whakareanga e pakanga ana kia ora ai te reo Māori i ngā tāone iti iho, tae noa ki ngā tāone nui katoa. I ā tātou pouaka whakaata, i ō tātou kura, i ō tātou wāhi mahi, ā, mātua rā i ō tātou kāinga. Me kōrero, me pupuri ēnei kōrero,” tā te Toihau o Te Taura Whiri i te Reo Māori, tā Ahorangi Rawinia Higgins.  

“E hiahia ana mātou kia uiuitia e ngā rangatahi o Aotearoa ō rātou mātua, ō rātou pākeke: “I pēhea a Aotearoa nō rātou e pakeke ake ana? He aha ngā wāhi i kitea, i rangona rānei te reo?” 

“He nui ngā whakanuinga hira i tēnei tau, me te aha, e āki ana mātou i te takitahi, i te whānau me te hapori kia tukuna mai tētahi kōrero, tētahi maharatanga, tētahi manatunga rānei e āwhinatia ai te kōrerotia o ngā pakanga mō te reo taketake o Aotearoa.” 

Ko ngā whakanuinga hira i te tau 2022 mō te reo Māori:  

  •        Kua 50 tau i te whakatakotoranga o te petihana o te reo Māori;
  •        Kua 35 tau i te whakamana o te reo Māori hei reo ā-ture; ā, 
  •        Kua 35 tau i te whakatuwheratanga o Te Taura Whiri i te Reo Māori. 

Ko ētahi atu whakanuinga i tēnei tau:  

  •        Kua 50 tau i te tīmatatanga o Te Matatini (he ingoa anō tōna i taua wā);
  •        Kua 40 tau i te kōhanga reo tuatahi;  hei āpititanga atu,
  •        Ka whakanuia e ētahi o ngā reo irirangi ā-iwi ā rātou ake whakanuinga ā-tau. 

Hei tēnei tau, hei te tau 2022, ka kitea tuatahitia te rā whakatā ā-ture o Matariki, he kaupapa kua neke atu i te 20 tau a Te Taura Whiri i te Reo Māori e kōkirikiri ana.  

“Kāore i rerekē i ngā tau maha nei te whakataunga me tautoko tonu e Aotearoa whānui te reo e ora ai, e puāwai ai. E mōhio ana mātou ka ngaro te reo i te whakareanga kotahi, ā, e toru ngā whakareanga e ora ai anō ia: E haere ana te wā.  

Kua tukuna hoki e Te Taura Whiri i te Reo Māori ngā putanga o ngā whakaaro i te uiuinga tūmatanui a Colmar/Kantar.  

“Kua nui atu te hunga e whakapono ana he wāhi nui tō te reo Māori ki tō rātou tuakiritanga i Aotearoa nei, ā, me whakahīhī tātou ki te kōrero Māori. I ngā tau e 35 ki muri, i nui te hunga i wehi i te whakamanatanga ā-ture o te reo Māori i Aotearoa, kei noho wehewehe tātou. Engari i te tau 2022, ko tā te reo he whakakotahi. Koia tonu te reo o Aotearoa me te hunga e whakapae ana ko Aotearoa tō rātou kāinga.”  

“Mai i te wā i rāhuitia te reo, ki ngā porotēhi me ngā petihana, ki ngā kerēme o Te Tiriti o Waitangi, ki ngā kerēme tauutuutu i kawea ki te Rūnanga Ruānuku o te Kuīni: i pakangatia te pakanga o te reo Māori puta noa i ngā tēpu kai i ngā kāinga, tae noa atu ki ngā kōti matua rawa o te ao. He taonga te reo hei poipoi mā Aotearoa, haere ake nei.”  

Ka whakarewatia e Te Taura Whiri i te Reo Māori tana pūnaha matihiko mō te tau 2022 ā tērā marama.  

KA MUTU