Nō te wā o Matariki 2001 i whakatuwherahia ai Te Kura Māori o Porirua, ā, nō Matariki 2021 i tukuna atu te karanga kia whakakotahi mai a iwi, a hapū, a whānau, a ākonga hoki ki te whakanui i te 20 tau, 21 whakatipuranga o te kura nei.   

Ko rau kaumātua ēnā i tae mai i te ata o te Tāite ki te whakatuwhera i te hui.  Ko te mahi a pēperekou mā ko te kawe i te tapu o ngā karakia o te ata hāpara kia ārahi i ngā whakahaere o tēnei hui nui.  Hāunga anō hoki, ki te whakatamarahi i ā rātou mokopuna me ā rātou mahi ki te kura. Mā wai e whakamaioha i te tamaiti me āna mahi?  Mā wai atu hoki! 

Ko rau whānau ēnā i tae mai i te Paraire ki te whakangahau ki te taha o ā rātou tamariki.  He whare hau pekepeke, he tārere porowhawhe, he mahi toi, he katakata, he menemene, he reo Māori te rere o te rā.  Koinei te wā whakaparana o ngā tamariki ki ō rātou whānau whānui, ki ō rātou tuakana, ki ō rātou teina anō hoki.

Ko rau kura ēnā i tae ki te kanikani i te pō o te Paraire, he ōkawa te hanga o ngā kākahu pīataata, he ōkawa hoki a reo mihi. Engari ko ōpaki me whakawhanaunga te kai nui o te pō. 

Ko rau kura anō ēnā i poro moe i te Hatarei kia tae atu ki te whakataetae hākinakina nui rawa atu o te ao o Te Kura Māori o Porirua.  He poitarawhiti, he poitūkohu, he hakahaka te kai, kia eke ki te karamatamata o pākiwaha me te kī atu, ko au te raukura o ngā raukura. 

Ko rau rahi ērā i tae atu ki te whakakapi i te hui ki te karakia nui i te ata o te Rātapu.  Ahakoa atua Hāhi mai, atua Māori mai rānei, koinei te wā whakawātea i tēnei hui nui whakaharahara o te whānau whānui o Te Kura Māori o Porirua. 

Ko ngā moemoeā o te kāhui kaumātua, arā Te Whakaruruhau o Te Kura Māori o Porirua kia noho ēnei tauira ki raro i ngā mātāpono i whakatauhia e rātou i ērā 20 tau kua hori.  Ko te Whanaungatanga tēnā i karanga kia hokihoki mai ngā Raukura o onamata hei pūmanawa mō ngā Raukura o anamata.  Ko te Kaitiakitanga tēnā i whakakao i tēnei hunga ki raro i te ara o Te Hau o Matariki ki te mauri o tēnei kura.  Ko te Whai Wāhitanga tēnā i āhei ai tēnei hunga pīkoko mō ngā kōrero me ngā whakaahua o ngā tau kua pahure, te haere mai ki te kai.  Kia tae atu ki te Rangatiratanga, e whakarangatira ai i ngā akoako o ngā tau kua pahure, kia noho ēnei hei mātāpono mō ngā raukura o tō mātou kura haere ake nei, haere ake nei. 

Kāti, ko tā He Muka he whakaputa kōrero ki te reo Māori. Ko ngā tirohanga, whakaaro rānei kei roto i te tuhinga nei he mea whaiaro nō te tangata nāna te kōrero i tuhi. Ka mutu, kāore i te whakaatu i ngā whakaaro o, i ngā kōrero a, rānei, Te Taura Whiri i te Reo Māori, āna kaimahi, tana pae whakahaere, tana poari rānei, tae atu rā ki ngā tari, ngā pakihi rānei e whai pānga ana ki Te Taura Whiri i te Reo Māori, ahakoa te hononga, hāunga i ngā mea kua āta whakahuatia ake ai.  Ehara ēnei tirohanga, whakaaro, kōrero rānei i te mea whakaiti, whakahē rānei, i te iwi, i te hapori, i te rōpū, i te tari, i te pakihi, i te tangata rānei.