TE TAUNGA TUARUA o ngā kākahu 'Kia kaha te Reo Māori' mō te raumati 2025

E wera haere ake ana te raumati i te taunga tuarua o ngā kākahu Kia Kaha Te Reo Māori ki Te Warewhare, i mua tonu i te Rā o Waitangi.
Whai muri i tōna hoko katoatanga i te rā kotahi i te tau 2024, kua hoki mai anō te kohinga kākahu e aroha whānuitia nei, e mau ana te tāhoko whakanui i te reo a Te Taura Whiri i te Reo Māori. Ka hokona ō-kawa te kohinga kākahu nei ki ngā whare hokohoko o Te Warewhare huri noa i te motu.
“I tērā tau, i whakamīharo kē Te Taura Whiri i te tere hoko atu o ngā rawa Kia Kaha Te Reo Māori i ngā paenga. He tautoko hoki tērā i tō mātou mōhio, e poho kererū ana a ngāi Aotearoa ki te whakaatu i tōna aroha ki te reo, ā, e hiahia ana rātou ki te whakaatu i taua ngākaunui. Ngāi Aotearoa, kua rongo mātou,” te kī a Ngahiwi Apanui-Barr, Tumu Whakahaere, Te Taura Whiri.
“Nō reira, kua mahi tahi anō mātou ki Te Warewhare kia nui atu ai ngā kākahu, hei hokohoko anō ki ngā whare hokohoko katoa e 88, ā, mā runga ipurangi anō hoki. Ko tā mātou whakapae ka tere pau anō nō reira kia tere e hoa mā!".
I tua atu i te hori me ngā tarau korikori e tino kaingākautia ana, kua whakaurua he pūweru hōu ki te kohinga kākahu o te raumati 2025, pēnei i ngā pōtae pākete me ngā hingareti poitūkohu. Waihoki, kua waihangatia he kākahu hōu mō ngā pēpi me ngā tamariki, ā, kua whakahoungia ētahi o ngā tāera pēnei i ngā poraka karakore. Katoa katoa kua tāngia ki te waitohu Ake Ake Ake – A Forever Language.
I tahia te poto o te wā mō te hoko i te kohinga whāiti tuatahi i te Mahuru 2024. He pērā rawa te kaha o te whai mai a ngā kiritaki, i tāpae whakaaro mai rātou i runga pae pāpori mō ngā hautaonga me ngā tae e hiahia ana rātou ki te hoko. Kua aro i a mātou ēnei whakahokinga whakaaro, hei tā Troy Rawhiti-Connell, Pou Whakawhanake Māori, Te Warewhare.
"Me uaua ka kitea tēnei kaha tautoko mō tētahi kohinga kākahu. I te kī mai a te marea kia nui noa atu ngā kākahu, i kotahi atu mātou ki Te Taura Whiri ki te whakamāherehere. E hīkaka katoa ana mātou ki te whakaatu i te kohinga hōu. Kua manahau mātou ka whai wāhi mai te katoa o ngā whare hokohoko e 88 huri noa i te motu ki te hoko atu ki a ngāi Aotearoa te kohinga hōu nā Te Taura Whiri, ā, mō te hunga kāore e kaha ki te uru ki ngā whare hokohoko o Te Warewhare, ka wātea hoki ngā hautaonga mā runga ipurangi," e ai ki a Troy.
"He arawātea anō tēnei kohinga mō Te Warewhare ki te 'whakatinana i te kōrero', arā, i tō mātou aroha ki te reo. Mai i ngā tohu reorua tae atu ki ngā hautaonga whai waitohu reorua, katoa katoa e whakatau noa ana i te noho mai a te reo hei reo ia rā, ia rā mō ngāi Aotearoa katoa.
Ka wātea te kohinga kākahu Kia Kaha Te Reo Māori ki ngā whare hokohoko katoa o Te Warewhare, ki runga ipurangi hoki ki thewarehouse.co.nz nō te 8 karaka o te ata o te 31 o Kohitātea 2025.