Te Arotakenga o Te Toi Reo Māori 2021/22
Ko Te Toi Reo Māori anake te tohu i Aotearoa e whakamana ana i ngā kaiwhakamāori reo Māori ā-tuhi, ā-waha. Ko Te Taura Whiri i te Reo Māori kei te whakahaere i Te Toi Reo Māori i runga i te whakahau a Te Ture mō Te Reo Māori 2016, i whakaaetia ai tāna tuku raihana ki ngā kaiwhakamāori ā-tuhi, ā-waha kua eke nei ā rātou mahi ki te taumata tika.
Kua rangiwhāwhā te kōrerohia o te reo Māori i te porihanga o Aotearoa, me te aha, kua nui haere te hiahia ki te ratonga whakamāori tuawhiti tonu, kua nui haere anō te horahia o ēnei tū ratonga. Ā, nō konei, kua tokomaha ake te hunga e whakauru ana ki Te Toi Reo Māori. E ngākau titikaha ana Te Taura Whiri i te Reo Māori kia tokomaha ake ngā kaiwhakamāori ā-tuhi, ā-waha kua takatū ki te kawe i ngā mahi, e kaha tautokona ana anō hoki mā roto mai i ngā kaupapa whakapakari ngaio.
Ko tā te arotakenga nei, he whakatewhatewha ko ēhea mahi, ko ēhea ahunga mō Te Toi Reo Māori kua whaihua, ko ēhea kāore i whaihua. Ka tirohia anō hoki he aha ngā panonitanga me mātua whakatutuki hei whakapai ake i Te Toi Reo Māori e angitu ai ia ki te ao tuihono ā ngā rā e heke mai nei.
Ko tētahi atu whāinga mō ngā kitenga me ngā taunakitanga o te arotakenga, ko te āwhina i Te Taura Whiri i te Reo Māori:
- kia kawea te whakamahere, te taunaha tāngata, rawa, me te tārai kaupapa-here mō te hōtaka ā ngā rā e tū mai nei i runga i te mōhio
- ki te whakapiki i te matatau o ngā kaiwhakamāori mā te whakarite ara tautini e ako tonu ai, e whanake tonu ai rātou
- ki te whakapūmau i te kounga o ngā kaiwhakamāori kua raihanatia.
