Kua hono tahi a Vodafone New Zealand me Te Taura Whiri i te Reo Māori i tētahi whakaaetanga mahi tahi kia whakanui, kia whakarauora anō hoki i te reo Māori.

Ko Vodafone NZ te pakihi tuatahi i te ao whānui ki te hono ā-rautaki ki Te Taura Whiri i te Reo Māori.

E ai ki a Russell Stanners, te Manahautū o Vodafone NZ, he pikinga whakahirahira tēnei e kaha ake ai te hononga a Vodafone ki ngā pakiaka ā-rohe.

Hei tāna, “He mīharo ki a mātou te hono tahi ki Te Taura Whiri i te Reo Māori. Mā tēnei whakaaetanga e pakari ake ai te hononga ki Aotearoa whānui, ki ngā hapori, ki ō mātou kiritaki anō hoki.”

“Ko te aronga o Vodafone he tūhono kia pai ake ai a āpōpō.

Ko tō mātou uara ā-ao “Kotahi Kamupene, He Pakiaka ā-rohe” te kipakipa e whakaritea ai he hononga whai tikanga, tūturu anō hoki ki te iwi Māori, e āhukahukatia ai hoki te tūranga ahurei o te reo me ngā tikanga i Aotearoa.

Kua hiamo katoa mātou ki te mahi tahi i te taha o Te Taura Whiri i te Reo Māori,” te kī a Russell.

E ai ki te tumuaki o Te Taura Whiri i te Reo Māori, a Ngahiwi Apanui, “He mahi whakaihiihi te mahi piritata me te kamupene nui, e oke nei ki te whakapiki i te whakamahinga, te mana, me te whaitaketanga o te reo.

“He ekenga nui tēnei mō te reo Māori i te mea, anei te kamupene e mea ana ki ō rātou kiritaki, neke atu i te toru miriona, he tūranga ahurei tō te reo i roto i te mahi o te ia rā, me te ao pakihi puta noa i Aotearoa.

E mihi ana au ki a Vodafone, mō rātou e waihanga rautaki, e hīkoi nei i te kōrero, mai i te poari tae noa ki ngā kaimahi. Waihoki mō te tohatoha pūtea, rauemi anō hoki e tutuki ai te kaupapa.

E akiaki ana a Ngahiwi i te hunga pakihi puta noa i Aotearoa ki te āta whakaaro ā te wiki o te Reo Māori e tū mai nei, me pēhea rātou e tautoko ake i te whanaketanga o te reo.

“He pai te reo Māori mō Aotearoa me te hunga pakihi e mahi ana i tō tātou whenua. Engari mā te mahi tahi, me te waihanga rautaki e haruru te taonga nei puta noa i te whenua nei. Koia pū te tikanga o ēnei whakaaetanga.”

“Ko Kia Kaha Te Reo Māori te kaupapa o Te Wiki o te Reo Māori o tēnei tau arā te whai kia kaha ai tō tātou reo. Ko taku hiahia ka kaha ake ngā kamupene nui ki te tū mai hei toa mō tō tātou reo e noho mōrearea nei.”

Ko Kirstin Te Wao te Kaiārahi Matahuhua me te Whakawhāiti. E whakapono ana ia he whakaū te whakaaetanga nei i te here a te kamupene ki te mahi tahi me Te Taura Whiri i te Reo Māori mō te wā roa. Mai i te tau 2011 i tuku pūtea tautoko, i kōkiri anō hoki i te reo Māori.

“Me mātua whakatō te reo ki te manawa o te pakihi ahakoa ko wai, ā kei te rekareka ahau e titiro ana a Vodafone ki te pae tawhiti.

“Ko tā mātou here wā roa nei ki te whakapiki ake i te mātauranga Māori me te whakamahinga o te reo Māori, he whakarei anō hoki i te tuakiri ake o te iwi whānui tonu o Aotearoa.

“E manawarū ana mātou ki te whakanui i te reo Māori mā te whakatere i te taupānga Hika Vodafone i ō mātou hoa mahi o tāwāhi i konei. Ko te reo tonu te take i noho motuhake ai, e tū whakahīhī ai tātou katoa o Aotearoa.”

Ka whakatere a Vodafone i te taupānga kaimahi, Hika, ā te Rāhina (10 o ngā rā o Mahuru) e uru ai te kamupene ki te whakarauoratanga o te reo Māori. He huarahi tēnei e ako ai ngā kaimahi i te reo me te whakamahi i te reo i ngā mahi o ia rā – i te mahi, i te kāinga anō hoki.