E ahu mai ana tā mātou pūtea i te iwi tūmatanui. Nā konei, me mātua whakatakoto kōrero mātou ki te Whare Pāremata me ngā hunga whai pānga nui mai ki te reo mō ngā mahi e tutuki ana i a mātou ina whakatairitea ki tā mātou SOI me te SPE, mā roto mai i tā mātou Pūrongo ā-Tau. Ki konei mātou paki ai i nga kōrero mō ā mātou mahi taunaki, tautāwhi i te whakaoranga ake o te reo Māori.

Ko te Tauākī Koronga mō ngā Mahi kia Tutuki (SPE) te ara e whai wāhi mai ai tō mātou minita noho haepapa ki te whakarite i ngā koronga mō ngā mahi e tika ana kia tutuki i ia tau. Ko tā te SPE he whakaatu i ngā matapae pūtea taipitopito, he whakatau anō hoki i ngā keonga me ngā tohuine mō te tau e tū mai nei.   

Ko tā te Tauākī Whakamaunga Atu (SOI), he tautohu i ngā takune rautaki mō te whā tau. Me mātua whakahou i ia toru tau, engari e whakaaetia ana anō hoki te whakahou i ōna wā anō i mua i te ekenga o te toru tau. He mea whakatakoto anō te SOI ki te aroaro o te Whare Pāremata. 

Ko tā tēnei Mahere Whakatinana he whakaatu atu i ngā tāpaetanga o ngā hinonga o Te Papa Kōrero (1.1) ki te Maihi Karauna i te tau pūtea 2021/22.

He wāhanga matua tā ngā hinonga nei ki te ārahitanga me te whakaritenga o te whakatinanatanga o te Maihi Karauna, ā, ki te mahi tahi ki Te Mātāwai e pai ai te whakahāngai atu ki te Maihi Māori.

Mai i te tau 2021/22 ā haere ake nei ka tāpirihia hoki ngā tāpaetanga o ērā atu o ngā tari kāwanatanga ki te rēhita i te wā ka rēhitatia ai ā rātou mahere reo ki Te Taura Whiri i te Reo Māori.

Ko te whāinga nui o te rautaki Maihi Karauna kia hanga i tētahi taiao e pai ai te tipu matomato o te reo Māori ki Aotearoa nei, mā ēnei āhuatanga matua e toru: Aotearoatanga (te piritahi o te motu), Mātauranga (Te Mātauranga me ngā Pūkenga) me Hononga (Te Whakapāpātanga).

Kia tū he pōtitanga ā-motu, kia tū mai rānei he minita hou, ka takoto i a mātou he Whakamahuki Poto mā te Minita Hou (BIM). Ko tā te BIM he whakataki i Te Taura Whiri i Te Reo Māori, he whakarāpopoto i ngā take nui o te wā kei te aroaro o Te Taura Whiri, ngā mahi e arotahia ana, me te āta tohu anō hoki i ngā whakatau me mātua whiriwhiri e te minita.

Katoa ngā Hinonga Karauna, me tāpae pūrongo i ia ono marama mō ngā hāereere, ngā mahi manaaki manuhiri me ētahi atu whakapaunga pūtea a te Tumuaki.

He kaupapa mahi kōkiri a Kia Toipoto whakawhiti ai i te rāngai Kāwanatanga, e aratakina ana e Te Kawa Mataaho (Public Service Commission), tērā e whai ana ki te whakarite utu ki waenganui i te tāne, i te wahine, ā, ki waenga hoki i ngā rōpū mātāwaka kei roto i ngā whakahaere kāwanatanga. E noho pūmau ana Te Taura Whiri i te Reo Māori ki te whakatinana me te whakatutuki hoki i te tōkeke moni whiwhi mō ā mātou kaimahi katoa. E takoto ana i te tuhinga ki raro nei, he aha ō mātou wehewehenga, me tā mātou mahere mahi e tutuki ai te whakarite.

Kia Toipoto Action Plan (Māori)

(download icon)2021/24

Kia Toipoto Action Plan (English)

(download icon)2021/24

(download icon)2022/23 Review