Ngā tikanga whakamahi

Mā runga noa i tō tirotiro, i tō whakamahi i te pae tukutuku nei, kua whakaae koe ki ēnei tikanga whakamahi.

Ngā tikanga whakamahi

Nau mai ki www.tetaurawhiri.govt.nz (te ‘pae tukutuku’), he pae tukutuku e whakahaeretia ana e Te Taura Whiri i te Reo Māori (‘mātou’, ‘tā/tō mātou’, ‘Te Taura Whiri’).

E hāngai ana ēnei tikanga ki te katoa o ngā kōrero, aha atu rānei kei te pae tukutuku, tae atu ki ngā rēhitatanga me ngā whakaurunga ka hua ake i tā mātou pae tukutuku. Mā te tirotiro, me te whakamahi i te pae tukutuku, kua whakaae koe ki ēnei tikanga whakamahi.

He kupu uapare

Tēnei rā Te Taura Whiri te whākorekore atu nei, te pare atu nei i te noho haepapa mō tētahi take, numanga, whakahau, paremata rānei ahakoa pēhea te āhua (tae atu ki te whakangongotanga) e hua ake ana, e whai pānga ana rānei ki te whakamahinga o tēnei pae tukutuku, tae atu ki ngā pārongo me ērā atu hanga katoa kua utaina ki te pae tukutuku nei, ki tētahi atu pae tukutuku rānei e tūhono atu ana mātou.

Te pūmau o te ratonga

Karekau ā Te Taura Whiri kupu taurangi, kupu whakaū, tauākī rānei, ahakoa mataaho, matahuna rānei, mō te pūmau o te ratonga. Kei a ia te mana ki te whakatārewa, ki te whakamutu, ki te whakarerekē rānei i te tomonga mai ki ētahi, ki te katoa rānei o ngā ratonga kei te pae tukutuku, ina tūpono hiahia ia, hei aha anō hoki te whakamōhio ka pērā te mahi.

Te Kaupapa-here Matatapu

Te panoni i ēnei tikanga whakamahi

Tērā tonu pea e panonitia e Te Taura Whiri ēnei tikanga whakamahi. Ka mana ngā pānonitanga ā te wā tonu e whakaputaina ai tēnei whārangi.

Te manatārua me te whakaatu nō hea, nā wai rānei

Ki te kore he kupu kē atu, nō Te Taura Whiri tonu, kua raihanatia rānei ki Te Taura Whiri, te manatārua me ērā atu mōtika mō ngā kai katoa kei te pae tukutuku nei www.tetaurawhiri.govt.nz – kōrero mai, aha mai. E whakaaetia ana tō tā me tō kapo kōrero i te pae tukutuku nei, engari me mātua ū ki ēnei whakaritenga katoa:

Katoa ngā tauira o ēnei whārangi ka puritia ki tētahi pae rokiroki, pūrere rānei, e whakaaetia ana kia mātakihia anō, kia tāia rānei he wāhanga o roto mō ngā kaupapa whaiaro anake.
Kia kaua he tuhinga i tēnei pae tukutuku, ōna whakairoiro rānei, e rawekehia.
E pai ana te tohatoha kōrero, engari me mātua manaaki te manatārua. Mō ngā hanga e tohaina ana, me whakaatu anō nō hea, nā wai rānei, ā, me kuhu anō he hononga ki te pūtakenga.
Kia kaua tētahi wāhanga o tēnei pae tukutuku e tāruatia, e rokirokia rānei ki tētahi atu pae tukutuku, e raua rānei ki tētahi atu pūnaha tikirau matihiko, ratonga rānei, ahakoa tūmatanui, tūmataiti rānei, ki te kore e mātua whakaaetia ā-tuhi e Te Taura Whiri i te Reo Māori.
Kia kaua e whakamahia, e whakaaturia rānei te ingoa o Taura Whiri i te Reo Māori ki te kore e mātua whakaaetia ā-tuhi e Te Taura Whiri i te Reo Māori.
Ki te kore he kōrero kē atu mō tēnei whakaahua motuhake, mō tēnā whakaahua motuhake, kāore e whakaaetia tō tārua, tō toha, tō panoni rānei i tētahi whakaahua ki te kore e mātua whakaaetia e mātou.
E tāpuia ana ngā mōtika katoa kāore i tukua māriretia i roto i ēnei tikanga whakamahi.

Te Whakamahi i ngā Waitohu

Te Noho Wātea o te Pae Tukutuku

E ū ana te pae tukutuku nei, a www.tetaurawhiri.govt.nz, ki ngā "Web Content Accessibility Guidelines 2.1” i https://www.w3.org/TR/WCAG21/.

Ko te kaha o te ū: (Kei te taumata A, AA, AAA)

Ngā hononga ki ngā ratonga me ngā pārongo whārangi

Me he pārongo atu anō e hāhauria ana, tukua mai he īmēra ki: [email protected]

He mea whakahou te whārangi nei i te: Hakihea 2021