Te tōtika me te ngākaunui ki te reo Māori

He wahapū koe i te reo Māori? E ngākaunui ana koe ki ngā mahi whakawhiti reo, whakawhiti whakaaro, auaha hoki mai i tētahi reo ki tētahi atu reo? Tēnā pea, māu te Toi Reo Māori!

Mā ngā manu kōrero o te reo Māori te hōtaka nei a Toi Reo Māori. He hōtaka utu-kore i tēnei wā. Ko tā te hōtaka nei he tuku tiwhikete ki te hunga e hiahia ana ki te whai i te aramahi o te whakawhiti reo ā-tuhi, ā-waha rānei i te reo Māori.

E tū ai koe hei kaiwhakawhiti reo ā-tuhi, ā-waha o te reo Māori, ko tōna tikanga:

  • He wahapū koe i te reo Māori me te reo Pākehā
  • He kaha tōu mārama ki te wetereo i te reo Māori (mātua rā mō ngā kaiwhakawhiti reo ā-tuhi)
  • He kaituhi matatau koe i te reo Māori (whakawhiti reo ā-tuhi anake)
  • E kaha ana ki te whakawhiti ā-tuhi kaua ko ngā kupu me ngā rerenga anake, engari, e kaha ana hoki ki te whakawhiti i ngā ariā tuatini i waengarahi i ngā reo
  • He kaiwhakamāori matatau i te kupu kōrero (whakawhiti reo ā-waha anake).

Hei āwhina pea, ko te hunga māraurau ko ērā e kaha ana ki te eke ki te Taumata 4, Taumata 5 rānei mō Whakamātauria Tō Reo Māori. Mā te whai wāhi atu ki ngā kauwhaurangi me te whakamātautau uru tōmua koe e āwhina kia mōhio mehemea kua rite koe ki te mahi i te whakamātautau whakamutunga. Kia mōhio mai koe, he tino pīerenuku te whakamātautau āheinga, me te aha, kāore pea ngā kaiuru katoa e riwha.