He kaupapa Māori a Te Kura Reo Rāngai Tūmatanui e aro motuhake ana ki ngā kaikōrero matatau o te reo Māori e mahi ana i te rāngai tūmatanui.  He mea kawe e Te Taura Whiri i te Reo Māori, ka whakarato tēnei wānanga rumaki, e whā rā te roa, i tētahi wāhi i poua ai ki te ahurea, ki te whakapiki i te mātau ā-reo Māori, me te tautoko hoki i te akoranga me te whanaketanga o te reo Māori huri noa i ngā whakahaere kāwanatanga. Ka whai wāhi ngā kaiwhakauru ki te whakapakari i tō rātou māramatanga ki ngā tikanga Māori, me te tuitui i ngā hononga mauroa puta noa i ngā tari.

Mai anō i tōna tīmatanga, e hia rau ngā tāngata kua tautokona e Te Kura Reo Rāngai Tūmatanui, mā te hōtaka hihiri o ngā kōrero, ngā waiata, te whakawhanaungatanga, me te whakamahere rautaki ā-reo. He mea whakarite motuhake tēnei wānanga mā te hunga kua taunga ki te takahi i te taiao rumaki reo Māori - otirā kei te Taumata 3, piki ake rānei, o te āwhata o Whakamātauria Tō Reo Māori (arā, te whakamātautau tohu taumata reo Māori) - e ū ana ki te kōkiri i te reo Māori i ō rātou wāhi mahi.

E rua ngā wānanga Kura Reo Rāngai Tūmatanui e whakahaerengia ana e mātou i ia tau. Ka tū mai te wānanga e whai ake nei i te 4 – 7 o Mei, i te tau 2026. E $800 te utu (hāunga te tāke hokohoko), ā, ka tū te wānanga ki te whare o Te Taura Whiri i te Reo Māori ki Te Whanganui-a-Tara.

E whai ana te kaupapa nei ki te:

  • Whakatupu i te whakamahinga o te reo Māori me te tikanga Māori i roto i te rāngai tūmatanui i ia rā.
  • Whakarato i te wāhi kia mahi ngātahi ai ngā tari, kia  whiwhi akoranga ngaiotanga hoki ngā kaiwhakauru mā roto i te tirohanga ao Māori.
  • Tautoko i te whakarauoratanga o te reo Māori mā te whakarato ki ngā kaimahi i ngā utauta e taea ai e rātou te ārahi me te kawe tonu i ngā kaupapa reo i roto i ō rātou whakahaere.
  • Tāmau i te kawa me ngā tikanga a Te Āti Awa hei hāpai i te mana ā-ahurea i te roanga o te wānanga.
  • Ehara rawa Te Kura Reo Rāngai Tūmatanui i te wānanga noa – he rangatohe kē ki te whakataunoa i te reo Māori ki te rāngai tūmatanui, he whakamana i ngā kaimahi kia manawanui, kia tūhonohono, ā, kia poua ā rātou mahi ki te ahurea.

Kua kati ngā rēhitatanga. E whai wāhi ai koe ki te rārangi tatari, tēnā īmērahia atu a [email protected]

 

Ā mātou Kaiako

Wairarapa | Te Arawa | Te Tairāwhiti

He raukura a Aperahama o te Kōhanga Reo, o te Kura Kaupapa, o Raukura me Te Whare Wānanga o Waikato. I tōna māwehenga atu i te rāngai ture, he tohutohu me te whakaako āno hoki ia i ngā kaupapa mai i Te Tiriti o Waitangi, ki te āheitanga ahurea, me te ātete kaikiri, me te wetetāmi, tae atu ki te reo me ōna tikanga. Kua mahi ngātahi tāna umanga, ko Engaging Well Ltd, ki te huhua o ngā tari kāwanatanga. He ākonga hoki ia i Te Pōkaitara, ā, ina tata nei ia i whakawhiwhia ki te Tohu Pikihuia mō te toikupu i te reo. E noho pūmau ana ia ki te whakarauora i te reo me ngā tikanga a tōna iwi.

Te Tai Tokerau | Te Puku o te Ika | Te Kāhui Mounga

He kanohi kitea a Te Uranga i ngā pae kaiako ki ētahi o ngā kura reo, arā, ki Te Kura Reo o Ngāti Kahungungu, Te Pīere o te Reo (Pōneke), me Te Kura Rōia. He ika ā-whiro hoki ia nō Te Panekiretanga. I tū a Te Uranga hei Rōia Hapori i mua i te tū hei Poutoko Ture Karauna. Kua ahu whakamua ia i ētahi tūranga matua i te kāwanatanga; arā, hei rōia o roto i ngā tari. He Kaiārahi Tāngata, Kaitohutohu Matua me te Aporei ki te Tumu Tuarua me te Tumu Whakahaere. Ko ia hoki te Tumu Tuarua Māori Whakakapi , te Rōia Tumu Tuarua Tai Ōhanga, ā, he Kaitohu o Kawea Law and Consultancy.

Ngāti Kahungunu | Rongomaiwahine | Rongowhakaata

He kanohi kitea a Piripi i ngā pae kaiako ki ētahi o ngā kura reo, arā ki Te Kura Reo o Ngāti Kahungungu, Te Pīere o te Reo, me te Kura Rōia. He ika ā-whiro ia nō Te Panekiretanga. He kaitohu a Piripi ki Kawea Law and Consultancy. He rōia tōna takenga, ā, kua whai wheako ia ki te whakarite rautaki, kaupapa here, whakakaupapatanga me ngā mahi kaupapa Māori. Inā tata noa nei a Piripi i ārahi i tētahi ohu ki te kōkiri i te rautaki a Te Arawhiti ki Te Tūāpapa Kura Kāinga. Ko tētahi kawenga o te tūranga ko te whakawhanake i te māramatanga o te rōpū whakahaere ki ōna haepapa ki Te Tiriti o Waitangi.

Ngā Pōtiki a Tamapahore

He kaiako, he kaiwhakamāori, he kaituhi anō hoki a Tākuta Vini Ieni Olsen-Reeder. He kaimahi ia mō te tari kāwanatanga i mua, e mārama ana ki a ia ngā nekeneke o tērā ao. Ināianei, e rua ōna pakihi. Ko te tuatahi, arā, ko Whiti Reo Ltd, he pakihi whakaako, whakamāori. Ko te tuarua, he pakihi hou ko ReoPol Ltd te ingoa. He pakihi āwhina i ngā tari, i ngā wāhi mahi mō te kaupapahere reo Māori, he ratonga AI kei a ia anō hoki. Tae atu anō ki te noho ki te Kāwanatanga me te kōkiri haere i ngā tini mō te reo tonu te take, e ū ai te Kāwanatanga ki tōna reina.

Ngā Meka

Kia whakatau mātou i ngā rā ka whakamaua ngā taipitopito ki tēnei whārangi.

Kua kati ngā rēhitatanga. E whai wāhi ai koe ki te rārangi tatari, tēnā īmērahia atu a [email protected]

Whai muri i te katinga o ngā Rēhitatanga, ka whiwhi īmēra koe hei whakamōhio atu mehemea rānei kua angitu tāu tono, kāore rānei.

Ki te angitu te tono, ka whakaurua te hononga ki te īmēra. He uiui tūmua tēnei puka. Ka tonoa koe ki te whakarato i tō matatau ki te reo, ōu wawata mō te Kura Reo, me ētahi pārongo e hiahiatia ana mō te tuku i te nama kia utua mai.

Mō te taha ki te utu i te nama, ka tonoa koe ki te whakarato i tō tau NZBN me tō īmēra matua. Kia oti tāu uiui tūmua te tuku, ka puta i tā mātou kāhui Ahumoni he nama, ā, ka tuku atu ki a koe hei utu māu i mua i te Paraire o te 27 o Pēpuere i te tau 2026.

Kia mōhio mai koe, ka whakaūngia tō rēhitatanga kia tae rawa mai tō utunga.

Ka whakahaere katoatia te wānanga whā-rā i te reo Māori. Mehemea he hāneanea tāu noho ki te taiao rumaki reo Māori – arā, he kaha ki te

whakarongo me te mārama, ā, he kaha hoki ki te kōrero - ka nui tōu matatau ki te whai wāhi mai. Mehemea e tino mōhio anaki tōu matatau, ki tōu māia rānei, ko tā mātou tūtohunga kia whakaoti koe i a Whakamātauria Tō Reo (arā, te whakamātautau tohu taumata reo). He kaupapa tēnei e whakahaerengia ana e mātou e hia 

 

Hei pānui i te roanga ake o ngā kōrero kia nui ake ai te mārama ki te whakamātautau tohu taumata reo Māori, me toro atu ki te whārangi kāinga mā te pāwhiri i tēnei hononga.kē ngā wā i te roanga o te tau. Ko tā te whakamātautau tohu taumata reo he tohu ki te kaha o te kaiwhakauru ki te hopu ā-taringa i ngā kōrero Māori, me te aromatawai i tōna mōhio ki ngā kupu me ngā ture wetereo. Tēnā, kia kaua e pā te hēmanawa, te kauparetanga rānei ki a koe mehemea kāore anō kia oti i a koe tāu whakamātautau tohu taumata reo. Mehemea kua whai wheako koe ki te noho ki te taiao rumaki reo Māori, kua whai tohu rānei hei taunaki i tōu hāneaneatanga, i tōu māia rānei i te reo Māori, tēnā, me rēhita i tō aronga ki te Kura Reo Rāngai Tūmatanui e anga whakamua tonu ai tōu haerenga.