Ngā Kaitautoko

Te Matatini

Ko Te Matatini Society Incorporated te rōpū whakahaere i Aotearoa e noho haepapa ana ki te poipoi i te kairangi, te whakawhanake, te tiaki hoki i ngā mahi a te rēhia. He mea tapa te ingoa nā Ahorangi Wharehuia Milroy, he kupu hiato, arā, I whakatūria i 1972 i raro i te ingoa o New Zealand Polynesian Festival, kua whanake Te Matatini i roto i ngā ngahurutau e rima hei pae ā-motu, ā-ao anō hoki mō te kapa haka. ko te mata, me te tini, ka hua ko te tikanga o Te Matatini "ngā mata tini". Ko te kapa haka he whakapuakitanga mataora o te tuakiri, o te whakapapa, o te hītori, o te reo me te tūrangawaewae. Mā roto mai i ngā waiata, ngā mōteatea, ngā haka, ngā poi, me ētahi atu whakangahau taketake, ao hou anō hoki, ka kōrero ngā kaihaka i ngā pūrākau o ō rātou whānau, ō rātou hapū, ō rātou iwi me ō rātou hapori. Tuku ai a Te Matatini i tētahi atamira ā-motu e whakanuia ai te kairangi, e poipoia ai te kotahitanga, ā, e tuaritia ai te ahurea Māori me ngā mahi a rēhia ki ngā whakaminenga nō Aotearoa, ā, huri noa i te ao. Kei tōna iho, ko tā Te Matatini he whakanui i a tātou anō, i tō tātou takenga mai me te whakareretanga mau tonu o te kapa haka mō ngā reanga e pihi ake ana. Mana Motuhake ki te Kāinga Matatū, Mataora, Matatini ki Te Ao.

Te Mātāwai

Tautoko mārika ana a Te Mātāwai i ngā mahi o ia rā e ora ai te reo Māori ki ngā kāinga, ngā hapori, me ngā iwi. Mā konei e hūrokuroku ai, e pakari ai hoki te anamata mō te reo. Tuatahi ake, ko tō mātou kawenga hei hoa haere, mā Te Mātāwai e pupuru te tūranga a te tangata Māori hei kaiarataki mō te whakarauoratanga o te reo Māori.  Mā Te Mātāwai e whakarite te taiao e taea ai e ngā whānau, ngā hapori, ngā iwi, me te iwi Māori, ō rātou rongoā te āki. Me pēhea e taea ai? Mā te tiaki, mā te whakatairanga, me te whakarauora hoki i te reo Māori mā roto i te mahi tahi, te arataki, te whakaaweawe, me te haumi kaupapa anō hoki. Ānō nei he wheke, totoro ai ōna kawekawe ki ngā rohe, arā, ngā kāhui. Kei tēnā kawekawe tōna mana whakatau ki te tuku i ngā haumitanga ki ēhea kaupapa whakahaumanu i te reo. E tutuki ai te tūruapō o "Kia Ūkaipō anō te Reo” e pīrangi ana mātou kia kite i ngā putanga whakaarotau matua e rua i roto i ngā kāinga me ngā hapori: Te tukuihotanga me te Hononga Hapori Reo. Ko tā Te Mātāwai he ārahi i tētahi momo rautaki Kaupapa Māori mō te whakarauoratanga o te reo Māori i a rātou e mahi tahi ana ki ngā hinonga Karauna kia tika ai te rere o ngā rauemi ki ngā iwi me ngā hapori, ka mutu te tukutahi hoki o ā tātou hua tōpū.

Ministry of Education

E ū ana a Te Tāhuhu o te Mātauranga ki te kōkiri i ngā whāinga o Tau Mai Te Reo me te tautoko i te whakarauoratanga o te reo Māori mā roto mai i te mātauranga. Puta noa i te huarahi mātauranga, mai i ngā akoranga kōhungahunga me ngā kura tae noa ki ngā whare wānanga, ka whakarite mātou i ngā arawātea e kaingākau ai, e ako ai, e whakamahi ai anō hoki ngā ākonga i te reo Māori. E arahina ana e te wawata o te Maihi Karauna, arā, Kia māhorahora te reo, ka whai mātou ki te whakarite i ngā āhuatanga e kitea ai, e rangona ai, e kōrerotia ai, e pānuitia ai, ā, e whakanuia ai hoki te reo Māori i ia rā. Mā te whakapakari i te mātau o ngā kaiako me te tautoko i ngā huarahi aratuku Māori, aratuku reo Ingarihi anō hoki, ka āwhina mātou ki te whakapiki i te māia me te matatau o ngā ākonga, me tō rātou hononga anō hoki ki te reo Māori, hei takoha atu ki tētahi anamata tōnui mō te reo, ā, mō Aotearoa anō. E whakanui ana mātou i te hunga katoa e whakatinana ana i ēnei whāinga me te hāpai ake i te reo Māori mā roto i ā rātou mahi.

Z Energy

Ko Z Energy (Z) tētahi o ngā kamupene pūngao waka matua o Aotearoa, ā, e poho kererū ana mātou ki te tautoko i te tohu Whakarangatira i te Reo 2026 | Language Leadership Award, e whakanui ana i ngā kaupapa reo a te rāngai tūmataiti e kaingākau ana, e whakapakari ana, ā, e whakanui ana hoki i te reo Māori. Hei kamupene nō Aotearoa e mahi ana mō ngā hapori puta noa i te motu, ko tā mātou tautoko i tēnei tohu he whakaaturanga o tō mātou takohanga ki Te Ao Māori me tō mātou haerenga ki te whakarētō i tō mātou mārama, ki te whakapiki i tō mātou mātau, me te whakapakari i ō mātou hononga ki ngā mana whenua me ngā hapori o Aotearoa whānui.

Go Media

E whakahīhī ana a Go Media ki te tautāwhi i Ngā Tohu Reo Māori me te tū tahi ki ērā e kōkiri ana i te tipu, i te kitea me te whakamahinga o ia rā o te reo Māori puta noa i Aotearoa. I tā mātou noho hei kamupene arapāho Māori, tipu i te kāinga, e mārama ana mātou ki te mana o te reo, o ngā pūrākau me te whai kitenga ki te tūhono tāngata, ki te whakapakari hoki i ngā hapori. Toro ai tō mātou whatunga whakatairanga ki ngā hapori puta noa i Aotearoa i ia rā, i whai arawātea ai mātou, ā, i noho haepapa ai hoki mātou ki te whakaata i te iwi, i ngā ahurea me ngā hapori e manaaki nei mātou. E whakahīhī ana mātou ki te tautoko i ngā mahi a te hunga e ārahi ana, e whakaaweawe ana hoki i te whakarauoratanga o te reo Māori, ki te whakanui i ō rātou ekenga me te whakatutuki i te wāhi ki a mātou ki te whakaū i te kitenga tonutanga, i te rongonga tonutanga, me te kaingākautanga tonutanga o te reo Māori mō ngā reanga kei te pihi ake.

Google

He mea nui ki te tīma o Google i Aotearoa tā mātou haere kōtui me Te Taura Whiri i te Reo Māori, ā, nō mātou te whiwhi ki te tautoko i Ngā Tohu Reo Māori 2026. E whakanui ana mātou i ngā kaiwhiwhi i tō rātou manawa tītī, i tā rātou ārahi, me tō rātou ngākau whitawhita ki te āki i te anamata o te reo Māori. Kia kaha te reo Māori!

Te Tumu Paeroa

E whakahīhī ana a The Māori Trustee ki te tautāwhi i Ngā Tohu Reo Māori. I runga i te tautoko a Te Tumu Paeroa, ko tā te Māori Trustee he whai ki te whakaū i te tiakitanga me te whakanikotanga o ngā whenua Māori, ināianei, ā, i roto i ngā reanga o āpōpō. Ko te whenua Māori me te reo Māori te tūāpapa o te mana Māori motuhake, ā, kua whītiki tahitia e te mauri, te whakapapa me te tuakiri. Mā te reo ka rangona ngā hītori, ngā tikanga, ngā mātauranga me ngā hononga kua tāmaua ki te whenua, ā, ko tā te whenua he tuku i te tūranga, te horopaki me te mana o te reo Māori. Ka kōrerotia ana, ka rangona ana, ka tukuna iho ana te reo Māori puta noa i ngā kāinga, ngā hapori me ngā papa kāinga, he poipoi tērā i te noho huānga, he whakapakari i te whakapapa, ā, he pupuri ki te āhua o tō te Māori mōhio, o tā te Māori whakawhanaunga, me tā te Māori noho. Hui katoa, ko tā te whenua Māori me te reo Māori he kawe whakamua i ngā ingoa, ngā pūrākau, ngā takohanga me ngā wawata e toitū ai ngā whānau, ngā hapū me ngā iwi puta noa i ngā reanga.

Rangiata Sky

Tautoko ai a Rangiata Sky i te whakataunoatanga o te reo Māori.  Puta noa i ā matou pae, ka whakatairanga mātou i te reo Māori, ngā tikanga, me ngā kōrero tuku iho o Aotearoa. Ka whakatenatena mātou i a Aotearoa whānui kia rata mai, kia piri mai ki te ao Māori me ōna ātaahuatanga katoa.