Uhi Tai, he hui i whakatūhia i te tau 2023 e Te Taura Whiri i te Reo Māori ki te whakawai i ngā wāhi mahi, ngā pakihi, me te hunga hīkaka ki te reo ki te eke ki ngā ngaru o te reo me te tuari i ō rātou wheako i runga i te huarahi kia māori anō te noho o te reo Māori, me te kohikohi hoki i ētahi ngaringari akiaki kia pai ai tā rātou whai i taua ara hei oranga mō ō rātou ake wāhi mahi. ​

Ko te whakamāramatanga o te Uhi Tai ko te paringa o te tai e kore nei e karohia, he kōrero kua whakahāngaihia ki te tai āniwhaniwha o te reo Māori me tōna whai wāhi mai ki tō tatou tuakiri-a-motu. ​

Ahakoa i whakatūhia te hui nei i runga i te aronui ki te rāngai tūmatawhānui, i mārama te kite me whānui kē atu te aro o te kaupapa, nā reira i puta te whakatau kia whai wāhi mai a te rāngai tūmataiti, ngā pakihi, me ngā wāhi mahi ka whai hua pea i te kaupapa, ā nā reira ka whānau mai ko Uhi Tai: Te Reo Māori in Business.

Te kaupapa kua pae mai ki uta

Ko te kaupapa matua o Uhi Tai 2026 - "Ihu ki te kei, we all have a part to play". He mea tango mai te kaupapa nei i te whakataukī Māori "Ihu ki te kei", e kōrero ana mō te ihu me te kei, te whiore rānei o te waka. Ko te iho o te kōrero nei e hāngai ana ki te whakaaro e kī ana e whai wāhi ana te waka mō te katoa, e whai tūranga ana hoki ia tangata ki te whakawhanake i te kaupapa. ​

Tāpuitia tō tīkiti! 

Kei te wātea ngā tīkiti kia hokona. E rua ngā momo tīkiti - he tīkiti mā te hunga ka tae-ā-tinana atu, he tīkiti hoki mā te hunga ka piri mai mā te ipurangi anake. 

Ngā utu:

Ipurangi anake = $172.50 NZD ā-takiurunga (kei roto hoki te utu tāke i te tapeke) 

Tae-ā-tinana = $575 NZD ā-tangata (kei roto hoki te utu tāke i te tapeke)  

Hokona ngā tīkiti i konei: Uhi Tai 2026 - Rēhita mai!  

He iti te puna tīkiti mā te hunga ka tae-ā-tinana ki te hui, nā reira kia tere te rēhita. 

Ka kati te puna rēhita hei te 10 o Pipiri 2026. 

He aha kei te hīnaki?

Ko ngā kaikōrero i ahu mai i ngā rāngai maha, he matatau, he tauhou hoki ki te reo, he kanorau hoki ngā ahunga mai me ngā wheako, koia hoki ka noho mai hei kaikōrero ki Uhi Tai 2026, ka tuari kōrero mō ngā hikoitanga kua hikoitia e rātou i rung ai te huarahi kia māori anō te noho mai o te reo Māori. Ko ētahi o ngā kaikōrero o mua i whakakanohi i a BNZ, Air NZ me Z Energy, me ētahi kaipakihi ngaio nō te rāngai mātauranga, pāpāho me ētahi atu rāngai hoki.

Mā wai te hui o Uhi Tai?

I whakatūhia a Uhi Tai mā ngā tōpūtanga, pakihi, me te hunga e hiahia ana kia whai wāhi atu te reo Māori ki ō rātou ao o ia rā. I tēnei tau, ko te aronga matua o Uhi Tai he mātoro i te rāngai tōpūtanga aunoa i runga i te whāinga ki te whakaaweawe i te katoa kia whakapono mai ki te noho o te reo Māori hei reo matua mō Aotearoa, me te whai wāhi hoki o te katoa ki tōna āpōpō. ​ 

Te Reo Māori i te ao Pakihi

Ko Te reo Māori te reo o Aotearoa, engari e mārama ana e uaua ana ki ētahi te kuhu me te tūhono ki te reo, ā nawai i uaua kātahi ka uaua kē atu i roto i te ao pakihi. Ka noho a Uhi Tai hei huarahi ki te whakamākūkū i te wae mā te whakarongo ki ngā kōrero a te hunga kua hīkoi kē i taua huarahi kia motuhenga te tautoko i te reo Māori i roto i a rātou pakihi me ō rātou ao hoki.

He mea whakarite te hui o Uhi Tai kia ngahau, kia tuwhera, kia whakahihiko whakaaro hoki, ka mutu, he mea āta whakarite ngā kaupapa kōrero kia hiamo te katoa ki te ruku atu.