Kāore e taea ngā toi te tauwehewehe i te reo Māori. Mai, mai, mai rānō he kauwaka ngā mahi toi hei whakaputa, hei whakanui, hei whakataunoa hoki i te reo i roto i ngā whakatupuranga.

I te rāngai toi o Aotearoa, ko Toi Aotearoa tētahi o ngā pūtahi tāpua. Ko tāna he whakatenatena, he whakanoi ake, he tautoko hoki i ngā mahi toi i Aotearoa hei painga mō ngāi Aotearoa katoa. Ko te tuku pūtea, me te waihanga raukaha, te whakahaere hōtaka huriao me te kōkiri kaupapa ngā huarahi ki te whakatutuki i tēnei.

He mea whakaū a Creative New Zealand i te tau 1963, ā, taka rawa mai ki te tau 1994 ka tapaina te hinonga Karauna nei ki te ingoa e mōhio ana tātou i ēnei rā, arā, ko Toi Aotearoa. E whakahaeretia ana te rōpū whakahaere nei e te Arts Council of New Zealand Toi Aotearoa. He Komiti Māori tō te kaunihera nei. E rārangi mai ana te Rautaki Toi Māori i te whāinga nei:

Kia kitea ngā toi Māori ki ngā wāhi katoa, waihoki, ka kaingākautia, hei wāhanga o te tuakiri motuhake o Aotearoa, ā, e whakamīharotia ana tēnei huri noa i te ao.

Kua rangā tāna tautoko i te reo ki tētahi whakakitenga whānui ki te whakatairanga ake, ki te tautāwhi hoki i te mātauranga Māori i ngā toi. Ko ētahi tauira o ngā pūtere i tautokotia e te rōpū whakahaere ki te whakatutuki i tāna whakakitenga rautaki ko ēnei:

• Hei tuatahitanga i te ao, he kaupapa ki te whakangungu i ngā mātanga whakatere waka kia tū hei tohunga (arā, hei kaiārahi ā-wairua). He mea arataki tēnei e Hoturoa Barclay Kerr.
• He kaupapa whakapakari i ngā tikanga tuku iho o te tārai waka. I kawea tēnei mā ngā hōtaka mātuatua e toru: Tangata Uta, Tangata Tai me Ratakaha ki Uta. He mea ārahi tēnei nā Hemi Eruera rātou ko tōna kapa. 
• He whakarato tautoko tonu ki te whakaoranga ake o ngā taonga puoro mā te mahi tahi ki te Haumanu Collective. 
• Te tautoko tonu i ngā iwi e waru o Taranaki, he mea kawe e ngā mātanga toi Māori tokoono nō Taranaki, ki te whakawhanake, ki te tuku hoki i te tūāoma tuarua o te hōtaka whakarauora Mātauranga Māori o Taku Poi He Manu, Taku Ringa He Manu. 
• Te tautoko ā-pūtea auroa me te mahi tahi ki Te Taura Whiri i te Reo Māori. 
• Te pātui auroa tonu ki Te Matatini ki te whakanui i te kapa haka hei kauwaka ki te whakapiki ake i te oranga o ngāi Māori me ō rātou hapori.

He mea whakatau tēnei e Toi Aotearoa i tāna pae tukutuku

Ka whakamāramatia e tā mātou rautaki toi Māori te āhua o tā mātou hono atu ki rōpū kē atu e whakaputa ai mātou i te panonitanga, me te whakapakari ake i te rāngai e piki ake ai te whai wāhi mai a ngāi Tūmatanui ki te whānuitanga o ngā toi Māori, ahakoa nō te ahurea tuku iho, ahurea o nāianei rānei

Nō Te Taura Whiri te whiwhi ka uru mai a Toi Aotearoa hei kaitautoko mō te wāhanga Ngā Toi i Ngā Tohu Reo Māori 2024. Kua pā a Toi Aotearoa ki ngā tauoranga katoa o ō tātou hautoa reo i ngā tohu. Nā rātou te kī ko Arataua Media te kaiwhiwhi i te tohu i te tau 2024. 

Ahakoa ko te nuinga o āna mahi i te ao pāpāho, he nui taioreore tonu ngā kohakoha a Arataua Media ki te horanuku auaha o te reo i Aotearoa. Ina koa rā ko āna rauemi reo Māori me ngā puoro whakamīharo hoki i Te Nūtube.

He mihi nui tēnei ki a Toi Aotearoa, mō tāna whakapau kaha hei hautoa reo, mā roto atu i te kōkiri i te mana o ngā toi Māori!