Te Wiki

I te tau 2021, i tū Te Wiki o te Reo Māori i te Rāhina te 13 ki te Rātapu te 19 o Mahuru. 

Ko Te Wā Tuku Reo Māori, e whakanuia tahitia ai te reo ahakoa kei hea ake tēnā me tēnā o tātou, ka tū ā te Rātū te 14 o Mahuru, ā te 12 o ngā hāora i te ahiahi.

E whakatāiri ana Te Wiki o te Reo Māori i te tāpaenga o te Petihana Reo Māori ki te aroaro o te whare pāremata i te 14 o Mahuru 1972. Kua whakanuia Te Wiki i te Reo Māori i ia tau mai i te 1975.

Mō te orokohanga ake o Te Wiki o te Reo Māori

 

Kia kaha te reo Māori

Kei te mōhio whānuitia te tikanga o te ‘Kia kaha’ e te hunga kōrero Pākehā o Aotearoa. He hanga māori anō te kōrero mō te reo ānō nei he tangata – mātua rā te kōrero mō tōna hauora, mō tōna kaha, me tōna whakamāuitanga ake.

Koia i tika ai te kōrero ‘Kia kaha te reo Māori’ – he akiaki i a tātou, e kaha mai ai ko te reo, he akiaki anō i te reo kia kaha te tū mai.

Te whaitohu heitiki

Mai i te hīkoi tahi ki te tuihono tahi

Nō te tau 2016 i whakahaerehia ai e mātou te hīkoi tuatahi mō te reo Māori, ki Te Whanga-nui-a-Tara. He ara hou hei paihere i ngā hapori me ngā kura mō te reo te take.  Ka hipa te toru tau, ka hipa ake anō hoki i te 30,000 ngā tāngata i whai wāhi ki ngā hīkoi e whitu, huri noa i Aotearoa. Riro ana ēnei hīkoi hei kaupapa ā-motu whakahirahira e tuitui ana i ngā muka tangata huhua, taiāwhio noa.  

I te 2020, i te aranga ake o KORONA-19, ka whakakorehia ā mātou hīkoi mō te reo. Me te aha, ka tahuri kē mātou ki te tūhono i te mātinitini ki te ara tuihono. Ko tā mātou karanga ki te motu, kia huihui te 1 miriona tāngata mō Te Wā Tuku Reo Māori.

Nō te 12 o ngā hāora i te ahiahi o te Rāhina, te 14 o Mahuru 2020, i te rangi tonu, i te wā tonu i tāpaetia atu ai te Petihana Reo Māori ki te whare pāremata i te 1972, ka whakaheia tā mātou karanga e te 1 miriona tāngata. I tērā hui ngātahi, ka tāia he tuatahitanga hou ki ngā tātai kōrero o Aotearoa, inā hoki, koia te whakanui rahi katoa i te reo Māori, mai, mai anō. Kātahi anō ka pēnei rawa te nuipuku e whakatāiri ngātatahi ana i te reo i te wā kotahi pū.



 

Piki mai, kake mai

Kua āhei koe iāianā te kuhu mai ki tēnei kaupapa reo Māori i ngā wiki, i ngā marama katoa o te tau. Tēnā tūhono mai, i www.reomaori.co.nz, kia mōhio ai koe he aha ngā kaupapa pārekareka ka tukua kia rere i tēnei tau. 

Tūhono mai ki te rangaihi

Rauemi reo Māori

Kua huihuia ngā akoranga reo Māori ki tā mātou pae tukutuku www.reomaori.co.nz

Haere

Ngā Tohu Reo Māori

Hei whakanui i ngā tāngata me ngā kaupapa e mairanga ana i te reo Māori

Haere