He reta ki te motu nā Te Taura Whiri i te Reo Māori
I tīni ā tātou tikanga i tēnei wiki, ā, e kore pea e hoki ki ētahi o ōna āhuatanga i ō mua tau.
He matahuhua te manaakitanga i te ao e tino tere hurihuri nei.
Ko tētahi mata ōna ko te tuku ā-wairua i te aroha me te tauwhirotanga.
Ko tētahi mata anō ōna ko te noho ki te kāinga me te noho kē.
Ko tētahi mata anō o te manaakitanga ko te hoko i te kai e hiahia koutou ko tō whānau: kaua ko te hoko kia pau katoa ai te kai hei hoko mā ētahi atu.
Ko tētahi mata anō ko te tirotiro i ō tātou kuia, koroua hoki me te hunga e aroha nuitia ana e tātou: me whakaaro nui mō ētahi atu.
Ko te atawhai ki te tangata, te koi o te hinengaro me te whakariterite ētahi mata anō o te manaakitanga.
Ko ēnei ngā tikanga e whakaatu ai tātou i te manaaki ki te tangata.
Ko tētahi wāhanga o te whakariterite mō te anamata ko te titiro whakamuri kia mau i a tātou ngā āhuatanga o mua. I te wā i pā mai te mate urutā ki Aotearoa, manomano ngā tāngata i hinga. I tipihaurarotia ngā hapori Māori. I Hāmoa, i te pānga o te mate urutā maremare o te tau 1918, 20% o te iwi o reira i hinga i ngā wiki ruarua noa iho. Hei tā te Pirimia i ngā rangi tata nei: me whakakaha tātou kia kaua e heipū mai anō aua āhuatanga ki a tātou.
Nō reira, me rangatira tātou katoa, me whakariterite tātou me te mea nui rawa atu: me whakaatu e tātou te manaakitanga.
I tērā wiki i rere atu te karanga ki ā mātou kaimahi e mōrearea ana: kia mahi mai i te kāinga, kia karangatia rātou kia hoki anō ki tō mātou whare mahi ai. Pērā i ngā wāhimahi katoa, atu i tēnei wā ka mahi mātou ki te kāinga kia puta te karanga ki te motu kua hiki te kohu, kua wātea tātou ki te hoki ki te mahi.
“He whare tū i te wā he kai nā te ahi; he whare tū i te pā he tohu nō te rangatira”
“A prepared house shows leadership. An unprepared house is a troubled house.”
Ngahiwi Apanui
Tumuaki
Te Taura Whiri i te Reo Māori