Kua hora te tēpu a Te Taura Whiri i te Reo Māori ki ētahi ō pārekareka nā Whānau Kai me Bargain Box ki te whakatairanga i te namunamuā o te reo i roto i ngā āhuatanga o ia rā. 

E whakanui ana a Aotearoa i te 50 tau o Te Wiki o te Reo Māori (Māori Language Week) i tēnei tau, ka mutu, ka tū ngā mahi whakanui-ā-motu hei te 14-20 o Mahuru 2025. 

“Ka whakahuihui te kai i te tangata, ā, he pērā hoki te reo Māori,” te kī a Ngahiwi Apanui-Barr, Tumuaki o Te Taura Whiri. 

“Mā te mahi tahi, e whakaatu ana mātou, pērā i te kai, ka whāngai te reo i te tinana, te ngākau me te hinengaro.  Mā te kai tahi me te kōrero tahi ka whai wāhi tātou ki ēnei hua katoa”. 

Apuaputia te reo me Whānau Kai

Manawa reka ana te rangapū mahitahi ki a Toilalo Naomi, nāna a Whānau Kai i whakatū, he kanohi kitea i te pouaka whakaata, kaituhi pukapuka, he kaiwhakaawe ā-matihiko, kua hono mai me te pae o Whānau Kai ki te whakanui i Te Wiki mā te whakaatu tohutaka kua ranua ki te reo Māori, tikanga Māori, me ngā uara whānau. Hei tāna, he wā hirahira Te Wiki ki te whakanui me te hoki mahara ki te huarahi roa o te reo.

“He wā whakanui Te Wiki o te Reo Māori ki a au. I tipu mai taku Māmā i te wā i te tino whakaparahakotia te reo Māori. Ināianei, i te tau 2025, he maha ngā mea hei whakanui, he roa te huarahi kua hīkoitia e tēnei whenua, ā, ko tā Te Wiki o te Reo Māori he hoki whakamuri me te whakaaro whakamua i runga i te ngākau rorotu,” te kī a Naomi.

Hei whakanui i te kaupapa, kei te tuari a Naomi i tana keke aramana tiakarete hūnene me te panireka Biscoff me te tiakarete, he keke huritau ki te whakanui i te ekenga o Te Wiki ki te 5-0.

"He ekenga mīharo te 50 tau, nā reira i hiahia au kia kikī te keke i te tāwara me te kakano. He reka te keke tiakarete ki te katoa, engari kia whakarākeitia ki te Maltesers, te panireka tiakarete me te Biscoff me ngā māngohe rāhipere - ki a au, he keke whakanui tonu tēnā!” hei tā Naomi.

E wātea ana te tohutaka i reomaori.co.nz me te paetukutuku o Whānau Kai, ā, kei reira hoki he whitiata tuku tohutohu.

Tonoa tō pūkete kai Bargain Box, ka taka kai i roto i te reo

Kei te mahi tahi hoki a Te Taura Whiri ki te ratonga pūkete kai, ki a Bargain Box nā My Food Bag, ngā hoa rangatira kaiwhakaawe, a Tahu rāua ko Chaeli Hollis, me ngā hoa kaiwhakaari a Scotty Cotter rāua ko Pehia King. Ngahau pai ana ngā takirua nei i a rātou e taka ana i ngā tohutaka kua whakawhitihia ki te reo Māori mō Te Wiki. 

“Kei te hīkaka mātou o Bargain Box nā My Food Bag ki te mahi tahi ki Te Taura Whiri i te Reo Māori ki te whakanui i te reo. Ko te kīhini te ngākau o te kāinga, ā, he wā pai mā te whānau te wā taka kai hei whakamātau tahi i te reo - kia ngahau, kia māori hoki te whakamātautanga i roto i ngā mahi o ia rā,” te kī a Austen Pierson, Kaiwhakahaere Waitohu o Bargain Box.

E rua ngā pūkete Bargain Box kua whakaritea hei tono mō Te Wiki – ko te Oko Parāoa Rimurapa Tīhipaka Mīti Kau 20-Meneti (the 20-Minute Cheeseburger Pasta), me te Heihei Auahi Parai (and Southern Fried Chicken). He poto noa te wā tono i ngā pūkete (Pūkete Tahi 1-8 Mahuru, Pūkete Rua 8-14 Mahuru), nā reira kia tere. Kei te paetukutuku o Bargain Box ngā taipitopito.

Ahakoa he kotinga keke huritau, he kai o te wiki rānei, he wāhi tō te reo Māori ki te tēpu. Whāia ngā whakaritenga mō Te Wiki i reomāori.co.nz.