Ko ngā kaupapa whawhati ngaru mō te reo Māori ērā i whakanuia ki Ngā Hōnore Reo Māori o te tau nei i tū I te pō nei ki roto o Tāmaki Makaurau. 

 I tū Ngā Hōnore Reo Māori, e kīia nei ko Ngā Kākā Kura o te Reo Māori, ki te Hōtera o Cordis hei whakanui i te hekenga werawera, i te whakapaunga ngoi e puta mai ai he hua mō te reo Māori, koni atu i te 50 ngā tau te roa o te titiro whakamuri ki te wā tonu i tata korehāhā te reo Māori. 

I whakahaerehia ngātahitia te pō whakahōnore e Te Taura Whiri i te Reo Māori me Te Mātāwai.  

E kī ana a Ngahiwi Apanui, te Tumu Whakahaere o Te Taura Whiri i te Reo Māori, kua okea ururoatia te pakanga mō te reo Māori e ngā toa takitini, ā, i autaia tonu ā rātau mahi e ora ai te reo.  

“Ka nui te pai o te whakahōnore i ēnei toa whawhai mō te reo Māori, nā rātou ngā tūāpapa i whakatakoto mō te whakarauoratanga o te reo Māori.”   

“E whakapono ana mātou ko te reo Māori te reo o Aotearoa, ā, he reo mō te katoa o ngāi Aotearoa. Nā ēnei haumāuiui i ngā 50 tau kua taha ake nei, kua ora te ngākau i te tutukitanga pea o te whāinga kia kotahi miriona ngā kaikōrero reo Māori hei te tau 2040,” te kī a Ngahiwi.  

Ko te hunga whiwhi hōnore, ko te kaupapa o Te Kōhanga Reo, i eke ki tōna huritau 40, ko Te Matatini, i eke ki tōna huritau 50, ko Te Reo Irirangi o Te Upoko o Te Ika me Ngā Kaiwhakapūmau i te Reo. 

E whakapono ana te Tumu Whakahaere o Te Mātāwai, a Ahorangi Poia Rewi, e ora pai ana te anamata o te reo Māori mō ngā iwi, mō ngā hapū me ngā whānau i ngā hapori, heoi me poipoi tonu. 

“Kei runga te angitu o te rangatohe whakarauora reo Māori i te mau tonu o te whakaaro nui o ngā tūao e takoha ana i te wā, te kaha, me te mātauranga.” 

Hāunga ia te kakama o ngā kaiārahi hapori me ngā kaikōkiri o te kaupapa o te reo Māori ki te hanga taiao mō te ako i te reo me te korekore o te rauemi, kia tino mārama tātou kīhai i mutunga kore tēnei puna kaha,” te kī a Poia. 

MUTUNGA 

Mo te roanga atu o ngā kōrero pāpaho, tēnā, whakapā atu 

Whitinga Harris 

[email protected] 

Eruini Paranihi 

[email protected] 

021 02347956