He koha huritau tōmua ngā tatauranga o te reo Māori mō Te Taura Whiri i te Reo Māori.
Ki tā Te Taura Whiri i te Reo Māori, he koha huritau tōmua ngā tatauranga hou e tohu ana i te ekenga o te hunga e taukoto ana, e korero ana hoki i te reo Māori, ki tētahi taumata kē atu.
“Ka 35 tau mātou i roto i te marama, i te rā i mana ai hoki te reo Māori hei reo ā-ture i Aotearoa. He koha huritau tōmua te mōhio kua nui ake te hunga e ngākaunui ana, e kōrero ana i te reo i ia rā," tā te Tumu Whakahaere o Te Taura Whiri i te Reo Māori, tā Ngahiwi Apanui.
“Ehara i te mea e ohorere ana mātou, he mōhio hoki nō mātou ki te nui o ngā tāngata i roto i ngā tau i whakaheke werawera, e pae ai te waka ki uta i tēnei rā. Kua pakangatia te whawhai mō te reo Māori i ngā hapori, i ngā taone, me ngā whānau i tēnā pito, i tēnā pito o Aotearoa, me te ngākau whiwhita kia whakamāuitia tō tātou reo."
"I te tau 1975, i iti iho i te 5% o ngā tamariki Māori e kōrero ana i te reo: ināianei, kua hauwhā o te Māori e kōrero ana i te reo Māori hei reo tuatahi. Autaia ana te hīkoi a ngā whānau Māori."
Nō te rā nei i whakaputaina ai e Tatauranga Aotearoa te kōrero, mai i te tau 2018, kua piki te nui o te hunga e mōhio ana ki ētahi kupu, ki ētahi rerenga hoki i te reo Māori mai i te 24 ki te 30 ōrau.
E mihi ana a Ngahiwi Apanui ki te hunga taiohi o Aotearoa. "Kua eke tātou ki wā, e 4 o roto i te 10 o ngā tāngata o Aotearoa e taea ana ngā kupu me ngā rerenga i te reo te kōrero, atu i ngā kupu ruarua nei. Ko te mutunga mai tēnei o te mīharo: he rā hou kei tua, ā, ka rerekē te āhua o ngā tāngata i Aotearoa."
"He rangi mīharo tēnei mō Aotearoa. Kia kaha te reo Māori!"
I tuwhera tuatahi Te Taura Whiri i te Reo Māori i te 1 o Ākuhata, 1987, i te rā i mana ai te reo Māori hei reo ā-ture i Aotearoa.