E mātua whakarite ana kia reo hauora, kia reo ngangahau, kia reo mauriora o ia rā, o ia rā te reo Māori

Ko Te Puni Kōkiri te kaitohutohu matua o te Kāwanatanga mō te hauora me te whanaketanga Māori.
Ko tētahi o ngā wāhanga arotahi o te whakahaere ko ‘Te Whare o Te Reo Mauriora me te Ao Pāpāho’ ko te wāhi ki Te Puni Kōkiri i konei ko te tautoko i te whakatipuranga kia ora, kia mauriora te reo Māori me ōna tikanga.
Nō reira, e tika ana ko te hinonga nei tētahi o ngā kaitautoko 13 mō Ngā Tohu Reo Māori i tēnei tau.
E kī ana te Hautū o Te Puni Kōkiri ki Ngā Rohe, a Grace Smit he mātuatua te reo Māori ki te matakite a Te Puni Kōkiri o ngā Whānau Ora.
“He mea whakapakari i te tuakiri ahurea, he whakatītina i te kotahitanga, ā, he mātua whakarite hoki i te tukunga o te mātauranga Māori.”
“Mā te whakatairanga i te reo Māori e whakamana ngā whānau, e whakapiki ana i tō rātou whakamanawatanga, mana hoki, e tautoko hoki i te oranga torowhānui me te manahautanga o ngā hapori Māori.”
E aro ana te tohu Rāngai Tūmatanui ki ngā kaupapa kōkiri kāwanatanga mō te reo Māori.
He mea tautoko ā-pūtea tēnei wāhanga o Ngā Tohu Reo Māori e Te Puni Kōkiri, e whakatairanga ana i ngā tari kāwanatanga, i ngā hinonga me ngā whakahaere i whakatinana i ngā kaupapahere, i ngā kaupapa pūtere me ngā kaupapa kōkiri rānei ki te tautoko i te whakarauoratanga me te whakauruurutanga o te reo Māori ki roto ki te ao tūmatanui.
Ka whakanui tēnei tohu i ngā tūmanako o te Maihi Karauna, me Te Whare o te Reo Mauriora ki te hanganga me te whakatinanatanga o te whare e noho ai, e kitea ai hoki te reo Māori hei reo o ia rā, o ia rā i Aotearoa.
E hāngai ana te tautoko o ēnei tohu ki te koromakinga o Te Puni Kōkiri ki te whakatairanga i te oranga me te whanaketanga Māori, te kī a Grace.
Mā te whakatairanga me te whakanui i ngā whakatutukinga, e whakaawe, e whakatenatena i ngā tāngata me ngā hapori kia eke panuku. Kei te whakahirahira ēnei tohu i te hiranga o te mahi tahi, te auaha me te manahautanga kia āwhina rā anō ki te hanga i ngā hapori Māori pakari ake, ngangahau ake.”
Ko te hunga i whiwhi i te tohu Rāngai Tūmatanui i te tau 2024 ko Te Kaunihera o Pōneke.
I whakamīharo katoa ngā kaiwhakawā i te papānga o te Kaunihera ki te aringa me te whakamahinga o te reo Māori i roto i tōna hapori.
Ina koa, i whakanuia Te Kaunihera o Pōneke mō tētahi rautaki matua e whakaahua ana i ngā momo kaupapa kōkiri ki te whakatairanga i te reo Māori, tae atu ki ngā utauta matihiko, te kura reo, ngā taiopenga me ngā tohu tiriti.