Iti rearea, teitei kahikatea ka taea!

Ko te kupu tuatahi ko Ihowa o ngā mano te Kīngi o ngā Kīngi katoa te kaihanga o te rangi me te whenua mai i a Ranginui heke iho nei ki a Papatūānuku. Kia whai whakaarohia rātou.
Ki ngā maunga whakahirahira o te motu puta noa i te Moana-nui-a-Kiwa, tū mai rā, tū tonu mai. Ki ngā iwi o te ika a Mauī, tēnei te mihi maioha atu ki a koutou.
E ngā mate o te wā haere, haere atu rā ki te okiokinga mutunga kore, hoki wairua atu ki Hawaiki Nui, Hawaiki Roa, Hawaiki Pāmamao.
Ko koutou te hunga wairua ki a rātou, ā, ko mātou ngā waihotanga mai a rātou mā, ka whai atu mātou i a koutou ā tōna wā.

Ko Maungapōhatu te maunga
Ko Whakatāne te awa
Ko Tūhoe te iwi
Ka moe a Hinepūkohurangi i a Te Maunga ka puta ko ngā tamariki o te kohu.

Tihei mauri ora!

 

“Iti te kupu nui te kōrero”

I tīkina ko tēnei o ngā whakataukī hei tīmatatanga mōku, i ngā hei whare kōrero mō ēnei maramara taka iho mai i te take o Maungapōhatu.  E rua rāua, ā Te Awarehe Waiariki me Karaitiana Rurehe. I tipu mai rāua i roto i ngā kohu tapu, i ngā kohu hau mirimiri o Ruatāhuna, Ruatāhuna kākahu mauku, Ruatāhuna paku kore. I pakeke hoki i roto i te ao wairua, i pā atu ngā ringa ki ngā mahi ā-rēhia. I pakeke hoki rāua i te nehenehe nui o Te Urewera.

I te wā e tamariki ana ka haere rāua ki Te Kura o Huiarau ki Ruatāhuna.  Ka tīmata tā rāua ako ki te whakairo, tekau mā tahi tau ō rāua pakeke. Ko Te Manimani Te Are te kaiako whakairo. Rua hāora i te wiki, kotahi rā i te wiki. Nā te ngākaunui ā ngā tokorua nei ki te whakairo ka kimihia he kura kia ako haere tonu rāua ki te whakairo. Ka kitea ko Te Puia, arā, te New Zealand Māori Arts and Crafts Institute  i raro i a Clive, James, me Albert. I Te Puia ēnei tohunga whakairo mai i te wā i tuwhera ai i te tau 1963. I nui ngā mahi i pā ai ngā ringaringa i roto i ngā tau mahue ki muri.

I roto hoki i ēnei tau mahue ki muri i whai a Karaitiana i te tohu Toi Reo Maori hei tūāpapa mō te tūnga mahi.  I Te Wānanga o Aotearoa a Karaitiana e rapu ana i te mātauranga. Ko te whakaaro ia ko te hoki ki te wā kāinga ki te whakaako i ngā taonga kua tangata whenua ki te ngākau. Hei koha whakahoki atu ki te orokohanga o te hīkoi i roto i te ao whakairo.

Koinā tāku wawata, heoi anō, i tēnei wā tonu, kei te whiwhi wāhanga whakaatu i runga i te Twitch ki te whakaatu mā te ipurangi. He poto noa iho ngā hāora, ā, kia mutu te mahi i Te Puia ka hoki atu ki te kāinga. Mai i te ao ki te pō e kōrero ana te whao me te hama.

Ko Karaitiana me Te Awarehe he rearea o te wao tapu nui a Tāne e eke ana ki te ikeiketanga. Kia eke ai hoki te whakataukī o Te Kura o Huiarau.

“Iti rearea, teitei kahikatea ka taea”

 


Kāti, ko tā He Muka he whakaputa kōrero ki te reo Māori. Ko ngā tirohanga, whakaaro rānei kei roto i te tuhinga nei he mea whaiaro nō te tangata nāna te kōrero i tuhi. Ka mutu, kāore i te whakaatu i ngā whakaaro o, i ngā kōrero a, rānei, Te Taura Whiri i te Reo Māori, āna kaimahi, tana pae whakahaere, tana poari rānei, tae atu rā ki ngā tari, ngā pakihi rānei e whai pānga ana ki Te Taura Whiri i te Reo Māori, ahakoa te hononga, hāunga i ngā mea kua āta whakahuatia ake ai.  Ehara ēnei tirohanga, whakaaro, kōrero rānei i te mea whakaiti, whakahē rānei, i te iwi, i te hapori, i te rōpū, i te tari, i te pakihi, i te tangata rānei.