He karere nā King Charles III
“ka rere atu aku oha nui ki ngā tāngata katoa o Aotearoa.”
I tēnei rā o Waitangi, taku tuatahi hei Kīngi mō Aotearoa, ka rere atu aku oha nui ki ngā tāngata katoa o Aotearoa.
He mea waitohu Te Tiriti o Waitangi i ngā tau 183 ki muri, i te wā i taku tipuna kuia, i a Kuīni Wikitōria. Ka kōtuia i reira te taukaea mutunga kore i waenganui i a tātou ko tōku whānau, ā, nōku te hōnore ki te renarena tonu i te taukaea nei.
Ko taku whaea, ko Kuīni Irihāpeta te Tuarua kua riro nei, te Ariki tuatahi o roto i a mātou kia toro atu ki Aotearoa me te papa i waitohua ai te Tiriti ki Waitangi. Ka tae atu hoki ia ki te whakanuinga i te 150 tau o te waitohutanga o te Tiriti i te tau 1990. He mea nui whakaharahara te papa o Waitangi me Te Tiriti o Waitangi ki a ia, ki te Ariki Tapairu. E mihi ana au, e kaingākau ana hoki ki te ngākau whakaute o ngā tāngata o Aotearoa ki te Ariki Tapairu kua riro, ina koa i tēnei wā o Waitangi, ki te ngākau whakaute o te Māori.
Mōku ake nei, i manawarū au i taku taenga atu ki Waitangi i ngā tau e whā ki muri, ā, i whai wāhi au ki te kawe atu i te korowai tuku iho i kohaina e Reihana Te Taukawau ki a Kuīni Wikitōria. He taonga puipuiaki tēnei ki a au, e tohu ana i taku hononga whai mana ki Aotearoa me te iwi Māori. Koia hoki i whai wāhi atu au ki te whakaū i taku ngākau titikaha, me tērā o aku tamariki, o aku mokopuna, ki tēnei hononga ki waenganui i a tātou, kia mau tonu iho mō ngā uri whakaheke.
Ko te Rā o Waitangi he wā e hoki ai ngā mahara ki onamata me te titiro whakamua ki anamata. E whakamānawa atu nei mātou ko tōku whānau ki a koutou katoa.
He aroha whakatō, he aroha puta mai.