Kua whakanuia anō ngā mahi whakaora ake i te reo Māori

Ko ngā kamupene me ngā pakihi ngā kaitautoko i ngā mahi whakarauora reo Māori i whakaete mai i te tekau mā whā o Ngā Tohu Reo Māori, i huihui ai te 400 tāngata ki Te Papa Tongarewa i te pō nei.

Ko ngā ingoa araara pērā i a Disney (i mahi tahi ki te Matewa Trust ki te whakaputa i te tauira reo Māori o Moana); i a Fletcher Construction (mō ngā tohuara reo Māori i Kāpiti); ko Vodafone rāua ko Google (e tika ake ai te whakahuatanga o ngā ingoa wāhi Māori i ngā mahere a Google); me Stuff (mō tana ruirui i te tohutō ki āna paetuku katoa, koia ētahi o ngā toa i tēnei tau. 

I toa te pakihi rōia Wackrow Williams and Davies Limited mō tā rātou mahi whakatairanga i Te Wiki o te Reo Māori. I te taha ki te kāwanatanga, i rewa ki runga ko Auckland Watercare Services i tā rātou whakatū rōpū hei kuhu haere i te reo me ngā tikanga Māori ki ā rātou mahi pakihi. I whakanuia hoki a Jack Tame, o Parakuihi TVNZ, mōna e kōrero Māori nei i te pouaka whakaata. Ko Tūwharetoa FM te toa mō te wāhi ki ngā mahi toi me te whakangahau; i whakamānawatia Te Wānanga o Aotearoa i tāna kaupapa Mahuru Māori e pau ai te marama i tōna apataki ki te kōrero Māori. Tērā anō a Pāia, he hōtaka mā te rangatahi i waihangatia e Maui Television Productions, kei Whakaata Māori e iri ana, e rua ngā toanga ki a rātou. Me kōrero anō te tirikohu waehere i kawea e Pāia – he tuatahitanga pea tērā ki te reo Māori.

Ko te tohu ki te tangata kua pau ōna kaha ki te reo Māori mai i tōna ohinga, ā kaumātua noa, i whakawhiwhia ki a Ahorangi Pou Temara o Te

Whare Wānanga o Waikato. He kaiako, he tautōhito anō ki ngā tikanga Māori me ngā toi kōrero o te ao Māori. I pakeke ake a Pou i Te Urewera, i waenganui o tōna iwi, o Tūhoe, ko te reo Māori tōna reo ūkaipō. Māringanui kua āta tukuna e ia ōna mātauranga nui ki te mano tini i ngā whare wānanga, i ngā wānanga tūturu nei anō.

Ko te tohu Huia te Reo i i uhia ki te toa o te tohu Takitahi, ki a Jeremy Tātere McLeod, mō tana tū hei tino tauira o te tangata kua mau pū i a ia te reo Māori.

I tipu ake ia ki Ahitereiria, kāore i paku mōhio ki te reo, ki ngā tikanga Māori. Engari mai i tana taenga ki Aotearoa i te 2004, kua kake i ngā aromaunga o te reo Māori – kua whiwhi i tana tohu paerua, kua  eke i ngā tūparipari o Te Panekiretanga o Te Reo, kua mana tana tū hei kaiwhakamāori, kua tū anō hei kanohi mō Te Tai Rāwhiti ki Te Mātāwai.

E ai ki te Tumuaki o Te Taura Whiri i te Reo Māori, a Ngahiwi Apanui, e whakaatu ana Ngā Tohu Reo Māori he maha ngā ara e eke ai te tangata ki ngā kōtihi o te reo. “Kei te whakaata hoki i te urupū, i te ngākaunui o te tokomaha ki te whakaora ake i te reo taketake o tēnei whenua. Ahakoa e whakanuia ana te whāngaitanga anō o te reo i waenganui i ngā whānau i ētahi wāhi i mutu tērā āhua i te hia tau ki muri, me whakanui anō hoki te puta o te ihu o te hunga e ako mārire ana i te reo Māori, ā, me tino mihi ērā i tīmata mai i te korekore, kua piki ki ngā keokeonga o te reo.”

“Whakamīharo ana hoki te kite i te kaha me te whānui o te tautoko mai a te ao pakihi i ngā mahi whakarauora. Kei te mārama haere ngā pakihi he waitohu pai te reo Māori hei tūtohu i tō rātou aroha nui ki Aotearoa, tō rātou tūturutanga, me tō rātou whakaaro nui ki te kiritaki. He rawe anō te reo Māori hei whiri i te muka tangata i roto i ngā mahi, hei tō mai anō i ngā titiro a iwi kē e tau ai te angitu ki te pakihi.”

Kotahi rau me te hau ngā tāngata me ngā rōpū i whakaurua mai ō rātou ingoa ki ngā Tohu nei i tēnei tau; koinei te tokomaha rahi katoa ā mohoa noa nei.



Te Wiki o te Reo Māori 2018 – Kia Kaha te Reo Māori!

He mea pānui i Ngā Tohu Reo Māori hei te 10-16 o Mahuru 2018 tū ai Te Wiki o te Reo Māori o tērā tau. Ko te 14 o Mahuru te Rā o te Reo Māori, he whakamaumaharatanga ki te rā i te tau 1972 i tāpaea ai te petihana mō te reo Māori ki te whare pāremata. Whai hoki, tērā anō te tini māioio e hāpai ana i a Mahuru Māori, e kōrero ai rātou i te reo Māori koia anake mō te roanga o te marama.

Anei te pepeha o Te Wiki o te Reo Māori 2018: ‘Kia Kaha te Reo Māori’. E whai ana i te ‘Kia Ora te Reo Māori’ o tēnei tau.  E mōhio pai ana a Aotearoa whānui ki te kōrero ‘Kia Kaha’, me te tikanga, e whakahau ana i te tangata kia māia, kia tū pakari. He wā anō tīkina atu ai he kupu e hāngai nui ana ki te tangata, ka whakahāngai kē ai ki te reo – inā ngā kōrero mō te hauora o te reo me te whakaora reo.  Nō konā, ko te pepeha nei, ‘Kia Kaha te Reo Māori’ – e whakatenatena ana i a tātou kia kori ake ki te whakakaha i te reo Māori.

Ka kitea he kaha, he ngoi mō te reo e mōrearea ana tāna noho i te nui o tōna mana, i te noho mārama mai o te iwi whānui me pēhea te tautoko i ngā mahi whakarauora reo, i te ako me te kōrero a te mātinitini i te reo, me te noho mai o ngā kupu katoa e rite ana e taea ai ngā kaupapa kōrero katoa a ōna tāngata te kawe ki taua reo. 

He ngoi kei ngā tāngata katoa o Aotearoa ki te whakakaha ake i tō tātou reo. Kua tatū ngā rā, kua tatū anō te kaupapa whāiti mō tērā tau, ā, ko te tūmanako kia ngaringari ake ngā whakahaere, ngā kamupene me ngā rōpū i te hapori ka āta manaaki mai i Te Wiki o te Reo Māori 2018. Kia kaha rā tātou!