Maihi Karauna: Kua Tīmata te whakahoutanga
E whakahou ana te Karauna i te Maihi Karauna, tāna rautaki whakarauora i te reo Māori i Aotearoa.
He reo whaimana ā-ture, he reo ora anō hoki te reo Māori, e kawe nei i ngā pūrākau, i ngā tuakiri, i ngā hītori me ngā anamata o Aotearoa. E tōnui ai te reo Māori, me kōrero, me rongo, me wāriu anō hoki i roto i ngā kāinga, i ngā kura, i ngā wāhi mahi, i ngā hapori, i ngā ratonga tūmatanui, ā, i te ipurangi.
Kua tīmata ngā mahi ki te whakaū e whanake ana te Maihi Karauna hou i ngā hua pai, ā, e aro ana hoki ki ngā wero nō te whakarewatanga o te rautaki tuatahi i 2019. Ko ngā taunakitanga hou e pā ana ki ngā pānga nui katoa ki te whakarauora reo ka noho hei tūāpapa mōna. Ka oti te Maihi Karauna hou ā te 2026.
Ko te mahi ngātahi tonu ka noho ki te iho o tēnei kaupapa. Nā Te Ture mō Te Reo Māori 2016 i hua ai he huarahi haere tahi mō te whakarauoratanga o te reo Māori i waenganui i te Karauna, ngā iwi me te iwi Māori. E whakatinanatia ana tēnei mā Te Whare o Te Reo Mauri Ora.
Ko tētahi taha o te whare ko te Maihi Karauna, ā, e arahina ana tēnei e Te Taura Whiri i te Reo Māori me Te Puni Kōkiri. Ko tāna he whāriki i te ahunga nunui, e whakaahua ana i te wāhi ki te reo Māori puta noa i te porihanga o Aotearoa, ā, i roto i ngā pūnaha kāwanatanga e tautoko ana i te reo kia puāwai. Kei tērā atu taha ko te Maihi Māori, ā, e arahina ana taua taha e Te Mātāwai, ko tāna he aro atu ki ngā whānau Māori, ki ngā hapori, me te tukuihotanga o te reo.
Hui katoa, e mahi ngātahi ana te Karauna me te iwi Māori ki te whakaū i te ora, i te kōrerotanga, me te whakanuitanga o te reo Māori e te katoa, i ngā wāhi katoa, ki anamata, ā, ā tua atu. Kia māhorahora te reo.